काठमाडौं । आगामी फागुन २१ गते हुने प्रतिनिधिसभा सदस्य निर्वाचनको तयारी तीव्र पार्दै निर्वाचन आयोगले ४४ जिल्लाका १०० निर्वाचन क्षेत्रका लागि मतपत्र छपाइ सम्पन्न गरेको जनाएको छ । मतपत्र छपाइ कार्य भक्तपुरस्थित जनक शिक्षा सामग्री केन्द्र लिमिटेडमा निरन्तर जारी रहेको छ ।
निर्वाचन आयोगका सहायक प्रवक्ता कुलबहादुर जिसीका अनुसार सोमबारसम्म कुल एक करोड २२ लाख ५६ हजार मतपत्र छपाइ सम्पन्न भइसकेको छ । छापिएका मतपत्रमध्ये विभिन्न जिल्लाका लागि आवश्यक मतपत्र प्याकिङसमेत गरिसकिएको छ भने हालसम्म १० हजार ७५९ बाकस मतपत्र प्याकिङ सम्पन्न भएको जानकारी दिइएको छ ।
यी जिल्लाको मतपत्र छपाइ सम्पन्न
आयोगका अनुसार डोल्पा, मुगु, जुम्ला, कालीकोट, हुम्ला, जाजरकोट, दैलेख, रुकुम (पश्चिम भाग), सल्यान, सुर्खेत, बाजुरा, अछाम, बझाङ, डोटी, डडेल्धुरा, दार्चुला, बैतडी, कैलाली, कञ्चनपुर र पाँचथर जिल्लाको मतपत्र छपाइ सम्पन्न भइसकेको छ ।
त्यस्तै इलाम, तेह्रथुम, भोजपुर, ओखलढुङ्गा, सुनसरी, ताप्लेजुङ, सङ्खुवासभा, सोलुखुम्बु, खोटाङ, धनकुटा, बागलुङ, गुल्मी, झापा, गोरखा, म्याग्दी, पर्वत, बर्दघाट सुस्ता पश्चिम (नवलपरासी), मोरङ, उदयपुर र मुस्ताङ जिल्लाको मतपत्र पनि तयार भइसकेको आयोगले जनाएको छ ।
यसका अतिरिक्त लमजुङ, तनहुँ, स्याङ्जा र बर्दिया जिल्लाको मतपत्र छपाइ सम्पन्न भएसँगै हालसम्म ४४ जिल्लाका मतपत्र तयार भइसकेका छन् ।
पुस २२ देखि सुरु भएको छपाइ कार्य
प्रतिनिधिसभा सदस्य निर्वाचनका लागि समानुपातिक तथा प्रत्यक्ष निर्वाचन प्रणालीअन्तर्गत प्रयोग हुने मतपत्र छपाइ गत पुस २२ गतेदेखि सुरु गरिएको थियो । पहिलो चरणमा १० लाख ९८ हजार २०० नमुना मतपत्र छापेर विभिन्न जिल्लामा पठाइसकिएको आयोगले जनाएको छ ।
गत पुस २६ गतेदेखि समानुपातिक निर्वाचन प्रणालीतर्फको मतपत्र छपाइ सुरु गरिएको थियो । माघ १३ गतेसम्म दुई करोड आठ लाख ३० हजार मतपत्र छपाइ सम्पन्न गरी प्याकिङ, रुजु तथा ढुवानीको तयारी पूरा गरिएको आयोगले जनाएको छ ।
प्रत्यक्ष निर्वाचन प्रणालीको मतपत्र छपाइ जारी
प्रत्यक्ष निर्वाचन प्रणालीतर्फ करिब दुई करोड तीन लाख २३ हजार मतपत्र छाप्नुपर्ने आयोगको लक्ष्य रहेको छ । यसअन्तर्गत माघ १६ गते बिहानदेखि मतपत्र छपाइ सुरु गरिएको र कार्य तीव्र गतिमा अगाडि बढिरहेको जनाइएको छ ।
निर्वाचन आयोगले समयमै सबै मतपत्र छपाइ, प्याकिङ र ढुवानी सम्पन्न गरी निर्वाचनको तयारी व्यवस्थित रूपमा अघि बढाउने जनाएको छ ।
निर्वाचन तयारीमा आयोगको जोड
निर्वाचन आयोगले निष्पक्ष, पारदर्शी र व्यवस्थित निर्वाचन सम्पन्न गर्न आवश्यक सबै प्राविधिक तथा प्रशासनिक तयारी तीव्र बनाइएको जनाएको छ । मतपत्र छपाइसँगै सुरक्षा व्यवस्था, मतदान केन्द्र व्यवस्थापन, कर्मचारी तालिम र सामग्री ढुवानीसम्बन्धी तयारी पनि समानान्तर रूपमा अघि बढिरहेको आयोगको भनाइ छ ।
फागुन २१ गते हुने प्रतिनिधिसभा सदस्य निर्वाचनलाई लोकतान्त्रिक अभ्यासको महत्वपूर्ण अवसरका रूपमा हेरिएको छ । आयोगले मतदातालाई निर्धक्क र उत्साहपूर्वक मतदानमा सहभागी हुन आह्वान गर्दै आवश्यक सबै पूर्वतयारी भइरहेको जनाएको छ ।
