काठमाडौं। राष्ट्रिय स्वतन्त्र पार्टी (रास्वपा) का रवि लामिछाने विरुद्ध सहकारी ठगीसँग सम्बन्धित संगठित अपराध र सम्पत्ति शुद्धीकरण मुद्दाको अभियोगपत्र फिर्ता लिने महान्यायाधिवक्ताको निर्णयबिरुद्ध दायर रिटमा मंगलबार पनि सर्वोच्च अदालतमा सुनुवाइ हुनेछ।
सर्वोच्च अदालतका न्यायाधीशद्वय सारङ्गा सुवेदी र सुनिलकुमार पोखरेलको संयुक्त इजलासमा आइतबारदेखि सुनुवाइ निरन्तर चलिरहेको छ।
आइतबार र सोमबारको बहस अझै नसकिएपछि सुनुवाइ हेर्दाहेर्दैमा राखिएको थियो। गत पुस ३० गते महान्यायाधिवक्ता सविता भण्डारीले लामिछानेमाथि विभिन्न जिल्लामा विचाराधीन रहेका संगठित अपराध र सम्पत्ति शुद्धीकरणका अभियोग हटाउन जिल्ला सरकारी वकिल कार्यालयलाई निर्देशन दिएकी थिइन्।
महान्यायाधिवक्ताको निर्णयविरुद्ध वरिष्ठ अधिवक्ता दिनेश त्रिपाठी, कानूनका विद्यार्थी आयुष बडाल र युवराज पौडेलले सर्वोच्चमा छुट्टाछुट्टै रिट दायर गरेका थिए।
सर्वोच्च अदालतको यस सुनुवाइपछि अब लामिछानेको मुद्दामा महान्यायाधिवक्ता कार्यालयको निर्देशन कायम रहने वा नरहने भन्ने टुंगो लाग्नेछ।
