काठमाडौं । आगामी फागुन २१ गतेका लागि तोकिएको प्रतिनिधिसभा सदस्य निर्वाचन आउन अब २६ दिन मात्रै बाँकी रहेको छ । निर्वाचनको तयारी तीव्र भइरहेका बेला आचारसंहिता उल्लङ्घनका घटनामाथि निर्वाचन आयोगले निगरानी बढाएको जनाएको छ।
निर्वाचन आयोगका अनुसार आचारसंहिता उल्लङ्घन गरेको अभियोगमा ३४ राजनीतिक दल तथा सम्बन्धित उम्मेदवारसँग स्पष्टीकरण सोधिएको थियो। तीमध्ये २४ उम्मेदवारले आफ्नो जवाफ बुझाइसकेका छन् भने अझै १० जनाको जवाफ आउन बाँकी रहेको आयोगका प्रवक्ता नारायणप्रसाद भट्टराईले जानकारी दिएका छन्।
आयोगले निर्वाचन आचारसंहिताको प्रभावकारी परिपालना सुनिश्चित गर्न प्राप्त उजुरीहरूको आवश्यक जाँचबुझ गर्दै कारबाही प्रक्रिया अघि बढाइरहेको जनाएको छ। उल्लङ्घनका घटनालाई न्यूनीकरण गर्न केन्द्रीय आचारसंहिता अनुगमन समिति, जिल्ला आचारसंहिता अनुगमन समिति, जिल्ला आचारसंहिता अनुगमन अधिकृत तथा सम्बन्धित निर्वाचन कार्यालयहरू सक्रिय रूपमा परिचालन गरिएको छ।
निर्वाचन आचारसंहिता, २०८२ को दफा ३२ अनुसार ७७ वटै जिल्लामा सहायक प्रमुख जिल्ला अधिकारीलाई आचारसंहिता अनुगमनको जिम्मेवारी दिइएको छ। उनीहरूलाई आर्थिक बाहेकका अन्य विषयमा अनुगमन गर्ने अधिकार प्रदान गरिएको आयोगले जनाएको छ।
त्यसैगरी आर्थिक विषयको अनुगमनका लागि जिल्लामा प्रमुख कोष नियन्त्रक तथा कोष नियन्त्रकलाई आचारसंहिता अनुगमन अधिकृतको जिम्मेवारी दिइएको छ। छोटो समयमै सबै जिल्लामा सरोकारवालालाई आचारसंहिताबारे जानकारी गराउने तथा यसको पालना गर्ने प्रतिबद्धता गराउने कार्य प्रभावकारी रूपमा भइरहेको आयोगको दाबी छ।
जिल्लास्तरबाट प्राप्त आचारसंहिता उल्लङ्घनसम्बन्धी उजुरीहरूमाथि आवश्यक कारबाही भइरहेको आयोगले स्पष्ट पारेको छ। निर्वाचन नजिकिँदै जाँदा आचारसंहिता कडाइका साथ कार्यान्वयन गरिने आयोगको तयारी रहेको छ।
