काठमाडौं। यही फागुन २१ गतेका लागि तय प्रतिनिधिसभा सदस्य निर्वाचन आउन अब १६ दिन मात्र बाँकी रहेको छ।
निर्वाचन आयोग ले निर्वाचन खर्च बैंक तथा वित्तीय संस्थाका खातामार्फत गर्नुपर्ने बाध्यकारी व्यवस्था लागू गरेपछि उम्मेदवारले धमाधम खाता खोल्न थालेका छन्। राजनीतिक दल र उम्मेदवारले चुनावमा खर्च गर्न छुट्टै बैंक खाता खोल्नुपर्ने व्यवस्था आयोगले गरेको छ। सोही व्यवस्था अनुसार हालसम्म ६ सय ७१ जना उम्मेदवारले बैंक तथा वित्तीय संस्थामा चुनावी खाता खोलेका छन्।
आयोगका सहसचिव एवं प्रवक्ता नारायणप्रसाद भट्टराई ले ३ हजार ४ सय ६ जना प्रत्यक्षतर्फका उम्मेदवारमध्ये हालसम्म ६ सय ७१ जनाले मात्रै बैंक खाता खोलेको आयोगको प्रणालीमा सूचना प्राप्त भएको बताउनुभयो। यसअघि निर्वाचनमा बैंक खातामार्फत खर्च अनिवार्य गरिएको थिएन। यस वर्षदेखि भने निर्वाचन खर्च अनिवार्य रूपमा बैंक खातामार्फत गर्नुपर्ने व्यवस्था लागू गरिएको हो। बैंकिङ प्रणालीबाट निर्वाचन खर्च पारदर्शी हुने आयोगको विश्वास छ।
आयोगले भूगोल अनुसार उम्मेदवारले २५ लाखदेखि ३३ लाख रुपैयाँसम्म खर्च गर्न पाउने व्यवस्था गरेको छ। आर्थिक अनुशासन कायम गर्न यस्तो व्यवस्था गरिएको आयोगले जनाएको छ। आयोगका सचिव कृष्णबहादुर राउत का अनुसार दुर्गम कालीकोट जस्ता जिल्लाका सबै उम्मेदवारले बैंक खाता खोलिसक्दा पनि सुगम जिल्लाका केही उम्मेदवारले अझै खाता नखोलेको पाइएको छ।
नेपाल राष्ट्र बैंक का अनुसार देशका ७५३ वटै स्थानीय तहमा बैंक तथा वित्तीय संस्थाका शाखा विस्तार भइसकेका छन्। राजनीतिक दल र उम्मेदवारले २५ हजार रुपैयाँभन्दा बढी रकम बैंक खाताबाट मात्रै कारोबार गर्नुपर्ने व्यवस्था गरिएको छ।
यसैबीच आयोगले बैंक तथा वित्तीय संस्थाका प्रमुख कार्यकारी अधिकृतसँग छलफल गर्दै नगद बोकेर चुनावी खर्च गर्न नपाइने स्पष्ट पारेको छ। कार्यवाहक प्रमुख निर्वाचन आयुक्त रामप्रसाद भण्डारी ले बैंकिङ प्रणाली प्रयोगले निर्वाचन खर्च थप पारदर्शी हुने विश्वास व्यक्त गर्नुभयो।
