काठमाडौं । आगामी फागुन २१ गते हुने प्रतिनिधिसभा सदस्य निर्वाचनका लागि प्रत्यक्षतर्फ २ हजार ६५५ जनाले उम्मेदवारी दर्ता गराएका छन् । निर्वाचन आयोगका अनुसार दर्ता भएका उम्मेदवारमध्ये महिलाको संख्या ३०३ मात्रै रहेको छ भने पुरुष उम्मेदवार २ हजार ३५२ रहेका छन् ।
निर्वाचन आयोगका प्रवक्ता नारायणप्रसाद भट्टराईका अनुसार मंगलबार साँझ ५ बजेसम्म मुख्य निर्वाचन अधिकृत र निर्वाचन अधिकृतको कार्यालयमा प्रवेश गरेका उम्मेदवारलाई दर्ता गर्न दिइने व्यवस्था गरिएको थियो । सोही कारण कतिपय जिल्लामा रातिसम्म पनि उम्मेदवारी दर्ता हुने जनाएको आयोगले जनाएको छ ।
२७५ सदस्यीय प्रतिनिधिसभामा ११० जना समानुपातिक निर्वाचन प्रणालीबाट र १६५ जना प्रत्यक्ष निर्वाचन प्रणालीबाट निर्वाचित हुने संवैधानिक व्यवस्था छ । समानुपातिक तर्फको उम्मेदवारी दर्ता भने यसअघि नै गत पुस १३ र १४ गते सम्पन्न भइसकेको छ ।
प्रत्यक्षतर्फ उम्मेदवारी दर्ता सम्पन्न भएसँगै अब उम्मेदवारको प्रारम्भिक सूची प्रकाशन, उजुरी दर्ता तथा छानबिनलगायतका प्रक्रिया अघि बढ्ने निर्वाचन आयोगले जनाएको छ ।
