काठमाडौं । सहकारी ठगी प्रकरणमा हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने शुक्रबार (आज) थुनामुक्त हुँदैछन् । उच्च अदालत तुल्सीपुरको बुटवल इजलासले बिहीबार तोकेको २ करोड ६८ लाख रुपैयाँ धरौटी बुझाउने प्रक्रिया अघि बढेसँगै उनी रिहा हुन लागेका हुन् ।
हाल ललितपुरस्थित नख्खु कारागारमा रहेका लामिछानेको रिहाइ प्रक्रिया भने रुपन्देही पुगेपछि मात्र पूर्ण हुनेछ । कानुनी प्रावधानअनुसार जिल्ला अदालत रुपन्देहीमा उपस्थित भई कागजात प्रमाणीकरण गरेपछि मात्र उनले औपचारिक रूपमा रिहाइको पत्र पाउनेछन् । सोही प्रयोजनका लागि उनलाई आजै भैरहवा लगिँदैछ ।
उच्च अदालतले माग गरेको धरौटी रकम स्वीकार गर्दै इजलासले उनलाई थुनामुक्त गर्न आदेश दिएको थियो । बिहीबार नै लामिछाने छुट्ने हल्लाका कारण नख्खु कारागार परिसरमा समर्थकहरूको बाक्लो भीड लागे पनि अदालती प्रक्रिया पूरा गर्न बाँकी रहेकाले उनी आज मात्र छुट्न लागेका हुन् ।
