काठमाडौं । सहकारी ठगी प्रकरणमा पक्राउ परेका रास्वपाका सभापति रवि लामिछानेलाई धरौटीमा छाड्न अदालतले आदेश दिएको छ ।
कास्की जिल्ला अदालतका न्ययाधिश नीतिज राईको इजलासले उनलाई ६५ लाख धरौटीमा छाड्न आदेश दिएको हो ।
सभापति लामिछानेलाई धरौटीमा रिहा गर्ने आदेश दिँदै जिल्ला अदालत कास्कीले रवि लामिछानेलाई अहिले नै कसुरदार रहेनछन् भन्न सकिने मनासिब आधार नदेखिएको बताएको छ ।
तत्काल प्राप्त प्रमाणहरूबाट सभापति लामिछानेलाई पछि थप प्रमाण बुझ्दै जाँदा ठहरेबमोजिम नै हुने न्ययाधिश राईले उल्लेख गरेका छन् ।
‘प्राप्त प्रमाणबाट निज प्रतिवादी अहिले नै कसुरदार रहेनछन् भन्न सकिने मनासिव आधार नदेखिएता पनि तत्काल माथि उल्लेखित प्रमाणबाट पछि प्रमाण बुझ्दै जाँदा ठहरेबमोजिम हुने नै हुँदा निज प्रतिवादी रवि लामिछानेबाट फौजदारी अपराध कार्यविधि संहिताको ०६८ र ०७२ समेतको आधारमा धरौटीको ६५ लाख लिई वा सो बराबरको जेथा वा बैंक जमामत लिई वा दिन नसकेमा दफा ८० बमोजिम थुनामा राख्नू’ आदेशमा भनिएको छ ।
