काठमाडौं । चर्चित फिल्म ‘जात्रा’को तेस्रो श्रृंखला ‘महाजात्रा’को प्रदर्शन आगामी चैत ९ गते हुने भएको छ । निर्माता कम्पनी षट्कोण आर्ट्सले शनिबार टिजर पोस्टर सार्वजनिक गर्दै फिल्मको औपचारिक घोषणा गरेको हो ।
प्रदीप भट्टराईको पटकथा तथा निर्देशन रहने यो फिल्मलाई म्याक्स दिपेश खत्री र यज्ञश्वर पौडेलले निर्माण गर्नेछन् । कार्यकारी निर्माताको रुपमा रविन्द्रसिंह बानियाँ हुनेछन् ।
यो फिल्मसँग अभिनेता हरिवंश आचार्य पनि जोडिएका छन् । ‘महापुरुष’पछि हरिवंश र षट्कोणको यो अर्को सहकार्य हो । यसबाहेक ‘महाजात्रा’मा बिपिन कार्की, रविन्द्रसिंह बानियाँ, रविन्द्र झा र वर्षा राउत पनि शीर्ष भूमिकामा निरन्तर हुने भएका छन् ।
स्केच शैलीमा तयार पारिएको यो पोस्टरमा ट्रकमा पैसा थुपारेको देख्न सकिन्छ । यससँगै ट्रकको पछाडि केही वाक्य पनि लेखिएको छ । फिल्मको थिम यिनै वाक्यभित्र लुकेको अनुमान गरिएको छ । ‘जात्रा’का अघिल्ला दुबै श्रृंखला बक्स अफिसमा हिट थिए । षट्कोणले केही महिनाअघि आध्यात्मिक ड्रामा ‘डाकिनी’ रिलिज गरेको थियो ।
