काठमाडौं । चलचित्र कलाकार संघको अध्यक्ष पदमा अभिनेत्री रेजिना उप्रेतीले उम्मेदवारी दिने घोषणा गरेकी छन् ।
उप्रेतीले आफ्नाे सामाजिक सञ्जाल फेसबुक मार्फत आगामी चैत ४ गते हुने संघको महाधिवेशनमा नेतृत्वका लागि प्रतिस्पर्धा गर्ने जानकारी गराएकी हुन् । आफू निर्वाचित भए संघलाई क्रियाशील र रचनात्मक बनाउने उनले दावी गरेकी छन् ।
चलचित्र क्षेत्रमा आफू २४ वर्ष निरन्तर संघको सदस्य रहेको, आजीवन सदस्य हुँदै केन्द्रीय उपाध्यक्ष र वरिष्ठ उपाध्यक्ष भइसकेकाले अध्यक्ष पदका लागि आफू योग्य रहेको उनको तर्क छ । अभिनेत्री उप्रेतीले अध्यक्षको जिम्मेवारी पाएपछि व्यक्तिगत स्वार्थ भन्दा माथि उठेर संस्थाको प्रगतिको लाग्ने बताएकी छन्।
करिब ४५ वटा चलचित्रमा अभिनय गरेकी अभिनेत्री उप्रेतीले ‘इतिहास’ चलचित्रबाट अभिनय करिअर थालेकी थिइन् । उनको पछिल्लो चलचित्र ‘भाग्यले जुरायो’ नाम दिएकाे दुई वर्ष अघि सार्वजनिक भएको थियो ।
यसैबीच, कलाकार संघको आगामी महाधिवेशनमा अभिनेता सविन श्रेष्ठले समेत अध्यक्ष पदका लागि उम्मेदवारी दिने घोषणा गरेका छन् ।
