काठमाडौं । पछिल्लो पाँच महिनादेखि लुम्विनी प्रदेश सभाको बैठक बस्न सकेको छैन । यस अवधिमा १२ पटक बैठक आह्वान गरिए पनि प्रतिपक्षी नेकपा एमालेका कारण बैठक अवरुद्ध हुँदै आएको छ ।
विपक्षी दल एमालेले सूर्य चिन्हबाट चुनाव लडेका सांसद अजयबहादुर शाही र विमला वली खत्रीमाथि गरेको कारबाही सदर नगरेको भन्दै वैठक अवरुद्ध गर्दै आएको छ । ती दुवै जना भने प्रदेश सरकारमा मन्त्री छन् । सो विषय अहिले पनि अदालतमा विचाराधीन छ ।
प्रदेशमा माओवादी केन्द्रका कुलप्रसाद के.सीे. मुख्यमन्त्री भएसंगै एमालेले अवरोध सुरु गरेको थियो । अवरोधकै कारण संसदीय समितिको बैठक पनि बस्न सकेको छैन ।
संसद नचल्दा सरकारले वितरण गर्ने अनुदान, विकास बजेट र योजनालगायतका कामहरु अलपत्र छन् । अहिले पनि प्रदेशसभाको हिउँदे अधिवेशन कहिले सुरु हुने भन्ने टुंगो छैन ।
