कलाकार नीर शाहले नेपाली चलचित्र क्षेत्र उद्योग र राष्ट्रिय दुबै हुन नसकेको बताएका छन् । उनले औद्योगिक चरित्र हासिल गर्न नसकेका कारण चलचित्र उद्योगका रुपमा स्थापित हुन नसकेको उनले बताए । उनले देशभरीका सम्पूर्ण भाषा, संस्कृति, संस्कारलाई सन्तुलित ढंगबाट अगाडि बढाउन नसक्दा चलचित्रले राष्ट्रिय स्वरुप हासिल गर्न नसकेको बताए ।
‘जुन भाषालाई मात्र लिएर हामीले दशकौंदेखि चलचित्र बनाउँदै आईरहेका छौं । त्यसकै आधारमा राष्ट्रिय हुने भए भैसकेको हुनुपर्ने नी । किन हुन सकेन ? उनले अगाडि भने, – ‘किनभने ति सम्पूर्ण कुराहरुलाई, ति आफ्ना कुराहरुलाई जान्ने र माया गर्ने हिसावले बुझाउने प्रयत्न नै गरेनौं ।’
उनले देशभरीका सम्पूर्ण भाषा, संस्कृति, संस्कारलाई सन्तुलित ढंगबाट अगाडि बढाउन नसक्दासम्म चलचित्रले राष्ट्रिय स्वरुप हासिल गर्न नसक्ने बताए । कोरोनापछि नेपाली चलचित्र क्षेत्रलाई चलायमान बनाउन आर्थिक अभाव रहेको उनको भनाई थियो । अहिलेको अवस्थासम्म आइपुग्दा चलचित्र बनाउनका लागि वित्तिय रुपमा सहयोग गर्ने संस्था नेपालमा नहुँदा समस्या भएको शाहले बताए ।
‘हामीले करोडौं ऋण लिएर चलचित्र निर्माणमा होमिएका छौं । त्यो हाम्रो व्यक्तिगत जमानीमा गरिरहेका हौं । चलचित्र व्यवसाय अगाडि बढाउनका लागि भनेर उदार ढंगबाट विक्तिय सहयोग गर्ने संस्थाहरु हामीकहाँ कहिल्यै पनि भएनन्’ उनले भने, –‘यो भैदिएको भए चलचित्र क्षेत्रलाई चलायमान बनाउनका लागि सघाउ पुग्ने थियो ।’
