काठमाडौं । यस वर्षको च्याम्पियन्स लिग फुटबलको उपाधि इंग्लीश फुटबल क्लब म्यान्चेस्टर सिटीले जितेको छ ।
टर्कीको इस्तानबुलमा शनिबार राति भएको फाइनल खेलमा इटालीको इन्टर मिलानलाई १–० ले हराउँदै म्यान्चेस्टर सिटीले पहिलो पटक च्याम्पियन्स लिगको उपाधि जितेको हो ।
खेलमा म्यान्चेस्टर सिटीलाई विजयी गराउन रोड्रीले ६८ औं मिनेटमा गरेको गोल निर्णायक बन्यो । जितसँगै सिटीले यो सिजन महत्वपूर्ण तिन उपाधि जित्ने किर्तीमान पनि बनाएको छ ।
प्रशिक्षक पेप ग्वार्डियोलाको प्रशिक्षणमा म्यान्चेस्टर सिटीले यस वर्षको इंग्लीश प्रिमियर लिग र एफ.ए कप फुटबल जितिसकेको छ ।
