एजेन्सी । भारतीय सन्त जगतगुरु परमहंस आचार्यले अभिनेता शाहरुख खानको फिल्म ‘पठान’को विरोध गर्दै उनको छाला निकालेर जिउँदै जलाउने धम्की दिएका छन् ।
शाहरुखको आगामी फिल्म ‘पठान’को विवाद कम हुने अवस्थामा छैन । फिल्मको पहिलो गीत ‘बेशरम रंग’ रिलिज हुनासाथ सुरु भएको विवादले निरन्तरता पाइरहेको छ ।
भारतीय सञ्चार माध्यमका अनुसार फिल्मको गीतमा अभिनेत्री दीपिका पादुकोणले लगाएको बिकिनीको रंगलाई लिएर विवाद सुरु भएको हो । सोही कारण फिल्मलाई प्रतिबन्ध लगाउन भारतको विभिन्न ठाउँमा माग भइरहेको छ । शाहरुख र दीपिकालगायत फिल्मको टिमविरुद्ध उजुरी दर्ता समेत भएको छ । अहिले उक्त फिल्मको विरोध गर्दै सन्त जगतगुरुले शाहरुखको छाला निकालेर जिउँदै जलाउने बताएका छन् ।
सन्त जगतगुरुले भनेका छन्, ‘पठान फिल्ममा भगवा रङको अपमान गरिएको छ र हिन्दूहरूको भावनामा चोट पुर्याउने गरी यस्तो गरिएको हो । मानिसहरूले पैसा कमाउनको लागि यस्तो व्यापार गरेका हुन् । त्यसैले आज हामीले शाहरुख खानको पोस्टर जलाएका छौं । म त्यो दिनको प्रतिक्षामा छु, जुन दिन शाहरुख खान भेटिन्छ, म त्यो दिन उनको छाला निकालेर उनलाई जिउँदै जलाउनेछु ।’
सन्त जगतगुरु अगाडि भन्छन्, ‘मेरो मान्छेहरूले मुम्बईमा शाहरुखलाई खोजिरहेका छन् । यदि कसैले उनलाई भेटेर जिउँदै जलाए भने म उनको परिवारलाई आर्थिक सहयोग गर्नेछु।’
सन्त जगतगुरुले भगवा रङलाई घृणा गर्छौ भने तिम्रो धमनीमा बग्ने रंग पनि भगवा नै हो भन्दै आक्रोश व्यक्त गरेका छन् । उनले सूर्यको रंग भगवा, आगोको रंग भगवा, शान्तिको प्रतीक र सनातन धर्ममा विश्वास गर्ने सबैको लागि भगवा गौरव रहेको बताएका छन् । त्यसैले आफूले भगवा रङको अपमान नसहने उनको भनाइ छ ।
