एजेन्सी । भारतीय क्रिकेटर विराट कोहली एम्बेसडर रहेको कम्पनीलाई पत्नी अभिनेत्री अनुष्का शर्माले बिना अनुमति मेरो फोटो कसरी प्रयोग गर्नुभयो ? भनेर प्रश्न गरेकी छन् ।
अनुष्काले सामाजिक सञ्जाल मार्फत उक्त खेलकुद कम्पनीप्रति आफ्नो असन्तुष्टि व्यक्त गरेकी हुन् । जुन खेलकुद कम्पनीप्रति अनुष्काले आक्रोश व्यक्त गरेकी छन् । उनका श्रीमान् विराट सोही कम्पनीका ब्रान्ड एम्बेसडर हुन् ।
अनुष्काले सामाजिक सञ्जालमा उनको अनुमति बिना खेलकुद ब्रान्ड बनाउने कम्पनीले उनको फोटो प्रयोग गरेको बताएकी छन् । अनुष्काले आफू उक्त कम्पनीको ब्रान्ड एम्बेसडर नहुँदा कम्पनीले आफ्नो ब्रान्ड प्रमोशनका लागि आफ्नो फोटो प्रयोग गरेको बताएकी छन् । कम्पनीलाई ट्याग गर्दै अनुष्काले आफ्नो फोटो जतिसक्दो चाँडो हटाउनु पर्ने भनेकी छन् ।
अनुष्काले सामाजिक सञ्जालमा लेखेकी छिन्– ‘बिना अनुमति तपाईले कुनै पनि ब्रान्ड पब्लिसिटीका लागि मेरो फोटो प्रयोग गर्न सक्नुहुन्न । किनभने म तपाईको कम्पनीको ब्रान्ड एम्बेसडर होइन । कृपया यसलाई हटाउनुहोस् ।’
विराटले अनुष्काको क्रोधित पोस्टलाई लाइक गरेका छन् । यसबाहेक अनुष्काको पोस्ट रिपोस्ट गर्दै उनले खेलकुद कम्पनीलाई उक्त मामिलालाई समाधान गर्न भनेका छन् ।
अनुष्का र विराटको सन् २०१७ मा विवाह भएको थियो । उनीहरूले करिब तीन वर्ष प्रेमसम्बन्धमा रहेर विवाह गरेका थिए । उनीहरूले सन् २०२१ मा छोरी वामिकालाई जन्म दिएका छन् ।
अनुष्का आमा बनेदेखि फिल्मबाट टाढा भएकी छन् । तर, उनी चाँडै फिल्म ‘चकडा एक्सप्रेस’ मा देखिदै छिन् ।
