काठमाडौं । पश्चिमी अफगानिस्तानको हेरात सहरमा रहेको मस्जिदमा भएको विस्फोटमा एक दर्जनभन्दा बढीको मृत्यु भएको छ ।
शुक्रबार अबेर राति भएको विस्फोटमा परेर तालिवान समर्थक उच्च तहका अधिकारीहरुको पनि मृत्यु भएको अन्तर्राष्ट्रिय समाचार संस्थाहरुले जनाएका छन् ।
मस्जिद परिसरमा रहेका विभत्स तस्विरहरु सामाजिक सञ्जालमा देखिएसँग विस्फोटमा धेरै हताहती भएको आशंका गरिएको छ ।
हेरात प्रान्तका गभर्नर हेमदुल्लाह मोतावाकलले विस्फोटमा १८ जनाको मृत्यु भएको बताउनुभयो । यस्तै २३ जना गम्भीर घाइते भएको बताइएपनि सो संख्याबारे अझै पुष्टि हुन नसकेको बताइएको छ ।
विस्फोटको जिम्मा हालसम्म कसैले पनि नलिएको त्यहाँको सरकारले जनाएको छ । प्रत्यक्षदर्शीका अनुसार एक व्यक्तिले आफ्नै हातमा चुम्बन गर्दै आत्मघाती विस्फोट गराएका थिए ।
विस्फोटमा धार्मिक नेता मुजिब रहमान अन्सारी मारिएको तालिवानका प्रवक्ता जबिहुल्लाह मुजाहिदले बताउनुभयो ।
विस्फोटमा मारिएका धार्मिक अन्सारीले गत महिना भएको कार्यक्रममा तालिवानीहरुको पक्षमा खुलेर समर्थन गरेको बताइएको छ । सोही समयदेखि अन्सारीको हत्याको योजना बनाइएको हुन सक्ने तालिवानीहरुले आशंका गरेका छन् ।
काबुलको एक मदरसामा धार्मिक गुरु रहिमुल्लाह हक्कानीको आत्मघाती हमलामा मृत्यु भएको एक महिना नबित्दै अन्सारीको हत्या भएको हो ।
एक वर्षअघि सत्ता हातामा लिएसँग तालिवानीहरुले देशको सुरक्षा अवस्था बलियो रहेको दाबी गर्दै आएका छन् । तर, पछिल्ला महिनाहरुमा अफगानिस्तानमा श्रृंखलावद्ध विस्फोटका घटनाहरु बढ्दै गएका छन् ।
