काठमाडाैँ । माओवादी केन्द्रका अध्यक्ष एवम् नेकपाकालीन सचिवालयका सदस्य पुष्पकमल दाहाल ‘प्रचण्ड’ले वर्तमान पाँचदलीय गठबन्धनलाई कायमै राखेर लाने कुरामा दुईमत नभएकाे बताएका छन् ।
मंगलबार साँझ सिंहदरबारस्थित माओवादी केन्द्रकाे संसदीय दलकाे बैठककक्षमा बसेकाे नेकपाकालीन बहुमत सचिवालय सदस्यहरूकाे बैठकपछि उनले सतर्क हुँदै यस्ताे बताएका हुन् । उनले भने -वर्तमान गठबन्धन कायम राखेरै जानुपर्छ भन्नेमा त हामी सहमत नै छाैँ । गठबन्धनविरुद्ध याेजना बनाइएकाे हाेइन ।
बैठकमा विचार मिल्नेहरूसँग एकताबद्ध हुनेबारे पनि छलफल भएकाे प्रचण्डले सुनाए । ‘हामी त नेकपाकालीन सचिवालयका बहुमत सदस्यहरू हाैँ । त्यसमा विचार मिल्नेहरूसँग मिलेर जाने भन्नेबारे कुरा पनि भयाे । तर याे गठबन्धनविरुद्धचाहिँ भनिएकाे हाेइन है,’ उनले भनेका छन् ।
बैठकमा नेकपाकालीन सचिवालय सचिवालय सदस्यहरू प्रचण्डसँगै माधवकुमार नेपाल, झलनाथ खनाल, नारायणकाजी श्रेष्ठ र वामदेव गाैतम थिए । याे उनीहरूकाे दाेस्राे बैठक हाे । यसअघि पनि यी नेताहरूबीच छलफल भएकाे थियाे ।
