काठमाडौँ । नेपाली राजनीतिमा डा. बाबुराम भट्टराईलाई बौद्धिक र शिक्षित नेताको रूपमा लिइन्छ । तर, उनको राजनीतिक जीवन भने स्थिर हुन सकेन । परिणाममा उनी पटक पटक-अन्योलमा पर्दै आएका छन् ।
तत्कालीन माओवादीले सञ्चालन गरेको सशस्त्र युद्धमा होमिएर नेपाली राजनीतिमा उदाएर प्रधानमन्त्री समेत भइसकेका डा.बाबुराम भट्टराई माउ पार्टी माओवादी केन्द्र छाडेर हिँडेपछि एक पछि अर्को गर्दै अन्योलमा पर्दै आएका छन् । नयाँ शक्ति बनाएर माओवादी छाडेका उनी विभिन्न पार्टीसँग एकता गर्दै अगाडि बढ्दै फेरि नयाँ शक्ति ब्युँताउनेमा पुगेका छन् ।
डा. भट्टराईले संविधान जारी भए लगत्तै माओवादी छाडे । ३० जेठ ०७३ मा काठमाडौँको रङ्गशालाबाट नयाँ शक्ति पार्टीको घोषणा गरे । तर, २०७४ को स्थानीय र सङ्घीय चुनावमा नयाँ शक्तिले सोचे अनुसार परिणाम ल्याउन सकेन । त्यसपछि २३ वैशाख २०७६ मा उपेन्द्र यादव नेतृत्वको तत्कालीन सङ्घीय समाजवादी फोरमसँग एकता गरे । समाजवादी पार्टी, नेपाल बनाए । केही समय पछि महन्थ ठाकुर नेतृत्वको राष्ट्रिय जनता पार्टीसँग समेत एकीकरण भएर जनता समाजवादी पार्टी बनाए ।
तर, फेरि जसपामा विग्रह शुरु भयो । महन्थ ठाकुरले नयाँ पार्टी बनाए । उपेन्द्र यादवले पनि एकलौटी निर्णय गर्न थालेको भनेर डा. भट्टराईले मंगलबारदेखि काठमाडौँमा आफू पक्षीय केन्द्रीय समितिको विस्तारित बैठक सुरु गरेका छन् । यता, पार्टी अध्यक्ष उपेन्द्र यादव पक्षको पनि मंगलबार नै केन्द्रीय कार्यकारिणी समितिको बैठक वीरगञ्जमा बसेको छ । बुधबार उक्त समूहको केन्द्रीय समितिको विस्तारित बैठक बस्दैछ ।
एकै दिन, एउटै पार्टीका समानान्तर बैठक बसेपछि अब जनता समाजवादी पार्टी एक छैन भन्ने सन्देश गएको छ । यो बेला फेरि डा. भट्टराई नै अन्योलमा परेका छन् । पार्टी विभाजनको कुनै मनसाय नरहेको बताएका भट्टराईले राजनीतिक दस्ताबेजमा वैकल्पिक राजनीतिक शक्ति निर्माण गर्ने वा विचार मिल्नेसँग एकीकरण वा ध्रुवीकरण गर्ने विकल्प अघि सारेका छन् ।
सबैको सुझाव लिएपछि आगामी कदम तय गर्ने भन्दै उनले भने, ‘यहाँ हामीले यो, त्यो केही पनि नभनी सबै साथीहरूलाई बोलाएर तपाईँहरूको राय, सल्लाह लिएर यसको समाधान कसरी गर्ने भन्ने हाम्रो मक्सद हो ।’ तर बैठकमा उपस्थित अधिकांश नेताहरू उनी जस्तै अलमलमा देखिएका छन् ।
