काठमाडौं । नेपाली कांग्रेसका सभापति शेरबहादुर देउवाले आफूलाई साथ दिन आग्रह गर्नुभएको छ ।
शुक्रबार भृकुटीमण्डपमा भएको १४औं महाधिवेशन उद्घाटनमा बोल्दै प्रधानमन्त्रीसमेत रहेका सभापति देउवाले आफूलाई सभापतिमा विजयी गराए देशभर कांग्रेसको सरकार बनाउने प्रतिवद्धता व्यक्त गर्नुभयो ।
‘नेपालमा कांग्रेसको सरकार बनाउँछु, बनाउँछु, बनाउँछु,’ देउवाले भन्नुभयो, ‘तपाईंहरु मलाई साथ दिनुस् ।’
सभापति देउवाले आफ्नो सरकार आएको दिनदेखि देश र जनताले ओली र डरत्रासको शासनबाट मुक्ति पाएको दाबी गर्नुभयो ।
‘म प्रधानमन्त्री बनेको भोलिपल्टै देशले मुक्ति पायो, ओलीको शासनले मुक्ति पायो,’ उहाँले भन्नुभयो, ‘अबको दिनमा त्यसलाई बचाउने कि नबचाउने महाधिवेशन प्रतिनिधिले तय गर्छन् ।’
महाधिवेशनले आफूलाई सभापति बनाए आगामी निर्वाचनबाट स्थानीय तहदेखि केन्द्रसम्म कांग्रेसको सरकार हुने देउवाले बताउनुभयो ।
‘मलाई जिताउनुस् आउँदो सरकार पनि कांग्रेसको हुन्छ, तलदेखि माथिसम्म’ उहाँले भन्नुभयो, ‘त्यो मेरो जिम्मेवारी भयो ।’
सभापति देउवाले पार्टीभित्रको आन्तरिक प्रतिस्पर्धाले स्थानीय, प्रदेश र केन्द्रको निर्वाचन समस्या आउन नहुनेतर्फ पनि पार्टीका नेता तथा कार्यकर्तालाई सचेत गराउनुभयो ।
