काठमाडौं । नायिका ऋचा शर्मा आमा बन्ने भएकी छन् । चर्चित रियालिटी शो कमेडी च्याम्पियनकी निर्णायकसमेत रहेकी शर्माले आफू आमा बन्न लागेकोमा खुसी व्यक्त गरेकी छन् ।
बुधबार सामाजिक सञ्जालमा श्रीमान् दिपेक्षविक्रम राणासँग सजीवनको रुखमा पानी हाल्दै गरेको तस्वीर सेयर गर्दै शर्माले सबैसँग आशिर्वादको अपेक्षा गरेकी छन् । उनले एउटा जीवनलाई स्वरूप दिएर जीवन्त बनाउन पाउनु सौभाग्यको कुरा भएको बताएकी छन् ।
उनले लेखेकी छन्, ‘आमाले भन्नु हुन्थ्यो आफ्नो सन्तान भएपछि थाह पाउछस्, आज त्यही कुरा स्मरणमा आइरहेको छ । एउटा जीवनलाई आफ्नो गर्भमा हुर्काउने सौभाग्य पाउँदा, आज शब्दमा आफ्नो भावनाहरु पोख्न सकिरहेको छैन ।’
नायिका शर्माले आमा बन्न लागेको खबर बाड्न पाउँदा खुसी भएको बताएकी छन् । उनी लेख्छिन्, ‘आज आफ्नो धड़कन भन्दा कोही अरुको धड़कन म भित्र प्यारो आभास भईरहेको छ । आज तपाईंहरु माँझ यो खुसी बाँडन पाउदा सम्पूर्ण महसुश भइरहेको छ ।’
एउटा जीवनलाई स्वरुप दिएर जीवन्त बनाउन पाउनु सायद साच्चै नै सौभाग्यको कुरा भएको नायिका शर्माको भनाइ छ । उनी अगाडि थप्छिन्, ‘त्यही प्यारो जीवनको स्वागत गर्दै घरको दैलोमा म र मेरो श्रीमानले यो सजीवनको रुख रोप्दैछौं । यो नयाँ जीवनको आगमन र यो रुखको अटूट साथ सधै बनिरहोस् भन्ने तपाईहरू सम्पूर्णको आशीर्वादको अपेक्षा गर्दछु ।’
नायिका शर्माले गतवर्ष बितेकी आफ्नी आमालाई सम्झँदै लेख्छिन्, ‘आमा पनि पर क्षितिज बाट भन्दै हुनुहुन्छ होला, ‘छोरी आज ठुली भई ।’’
ऋचा र दिपेक्षको गतवर्ष मंसिरमा विवाह भएको थियो ।
