काठमाडौं । राष्ट्रिय महिला लिग फुटबलमा त्रिभुवन आर्मी क्लबले सहज जित निकालेको छ ।
ललितपुरको सातदोबाटोस्थित एन्फा कम्प्लेक्समा आज भएको पहिलो खेलमा आर्मीले विराटनगर महानगरपालिकालाई ७–० गोल अन्तरले परजित गरेको हो ।
आर्मीको जितमा शर्मिला थापाले ह्याट्रिक गरिन् । यस्तै बिमला चौधरीले दुई तथा रश्मी घिसिङ र बिमला बिकले एक–एक गोल गरेका छन् ।
जितसँगै आर्मी ५ खेलबाट १० अंकका साथ लिगको दोस्रो स्थानमा उक्लिएको छ । विराटनगर भने ७ अंकका साथ चौंथो स्थानमा छ ।
यसैबीच, आजै दिउँसो साढे २ बजे हुने दोस्रो खेलमा एपीएफ र चौदण्डीगढी नगरपालिकाबीच प्रतिस्पर्धा हुँदैछ । एपीएफ लगातार छैटौँ जितको खोजीमा हुँदा चौदण्डीगढी भने पहिलो जित निकाल्ने योजनामा हुनेछ ।
जारी लिगमा ५ खेलबाट एफीएफ १५ अंकका साथ तालिकाको शीर्ष स्थानमा छ । चौदण्डीगढी भने अंकविहीन छ ।
