काठमाडौं । आईसीसी महिला टी–२० विश्वकप एसिया छनोट अन्तर्गत सुपर थ्री चरणको खेलमा नेपालले संयुक्त अरब इमिरेट्स (यूएई)लाई पराजित गरेको छ ।
यो जितसँगै नेपालले आईसीसी महिला टी–२० विश्वकपको ग्लोबल छनोटमा स्थान सुरक्षित गरेको छ ।
जितका लागि पाएको १ सय १५ रनको लक्ष्य नेपालले १९.३ ओभरमा पुरा गर्यो । नेपालको जितमा कप्तान इन्दु बर्माले कप्तानी पारि खेलिन् ।
उनले नटआउट ३० रन बनाइन् । २८ बलको सामना गरेकी बर्माले नेपाललाई जित दिलाउन महत्त्वपूर्ण इनिङ खेलिन् ।
रुविना क्षेत्रीले ३२ र सम्झना खड्काले २१ रनको योगदान दिइन् । उपकप्तान पूजा महतोले १३ रन बनाइन् ।
राजमती ऐरीले ८ रन बनाउँदा कविता कुँवरले ५ रन थपिन् ।
युएईका लागि मिशेल बोथा, सुरक्षा कोट्टे, वैष्णवे महेश र ईशा ओजाले समान १–१ विकेट लिइन् ।
त्यसअघि टस जितेर फिल्डिङ रोजेको नेपालले सुरुआतमै केही दबाब सिर्जना गरे पनि यूएईले निर्धारण २० ओभरमा ७ विकेट गुमाउँदै ११४ रनको प्रतिस्पर्धात्मक योगफल खडा गर्न सफल भयो ।
युएईका लागि इशा ओझाले सानदार ३९ रनको योगदान दिइन् भने तीर्था शतिशले २१ रनको संयमित पारी खेलिन् ।
नेपालका लागि बलिङतर्फ मनीषा उपाध्याय चम्किइन् । उनले ४ ओभरमा मात्र २० रन खर्चेर ४ महत्वपूर्ण विकेट हात पारिन् । यस्तै, कविता कुँवरले २ विकेट र राजमती ऐरीले १ विकेट लिइन् ।
यसअघि नेपालले समूह ‘सी’ को विजेता बनेको सुपर–३ मा पुगेको थियो । सुपर–३ मा समूह ‘ए’ को विजेता आयोजक थाइल्यान्ड र समूह ‘बी’ को विजेता युएईले स्थान पक्का गरेका थिए ।
यसअघि सुपर–३ को पहिलो खेलमा थाइल्यान्डले युएईलाई हराएको थियो । अब सुपर–३ को अन्तिम खेलमा नेपाल र आयोजक थाइल्यान्डबीच मंगलबार खेल हुनेछ ।
सुपर–३ को अन्तिम खेलअघि शीर्ष स्थानको थाइल्यान्डको ८ अंक, नेपालको ७ अंक र युएईको ६ अंक भएको छ । युएईले सबै खेल खेलिसकेको छ ।
