काठमाडौं । नेपाली राष्ट्रिय महिला फुटबल टोली ऐतिहासिक उपलब्धि नजिक छ । साउदी अरेबियामा आज नेपाली टोलीले वाफ वुमन्स च्याम्पियनसिपको उपाधिका लागि जोर्डनसँग प्रतिस्पर्धा गर्दैछ । खेल नेपाली समय अनुसार राति पौने १० बजे जेद्दाहस्थित प्रिन्स अब्दुल्लाह अल-फैसल स्पोर्ट्स सिटी मैदानमा हुनेछ ।
नेपाल र जोर्डन दुई फरकस्तरका टोली हुन् । पहिलोपटक वाफको प्रतियोगितामा सहभागी नेपालले फाइनलमा त्यस्तो प्रतिस्पर्धी पाएको छ, जसले अहिलेसम्म भएका ७ मध्ये ५ संस्करणको उपाधि जितेको छ भने डिफेण्डिङ च्याम्पियन समेत हो ।
अर्कोतर्फ यस प्रतियोगिता खेलेका ८ टिममध्ये जोर्डन सबैभन्दा माथि ७३औं स्थानमा छ । नेपाल भने १०५ औं स्थानमा छ ।
सन् २००५ मा सुरु भएको वाफ वुमन्स च्याम्पियनसिपको सुरुआती दुई संस्करण जितेको जोर्डनले २०१४ देखि पछिल्ला तीन संस्करणको उपाधि समेत जितेको थियो ।
जोर्डनले २०१४ र २०१८ मा एएफसी वुमन्स एसिया कप समेत खेलेको थियो । यस्तै तीनपटक एसियन गेम्स खेलेको छ ।
नेपालले भने अहिलेसम्म खेलेको सबैभन्दा ठूलो प्रतियोगिता एसियाली खेलकुद हो । असोजमा चीनको हान्झाउमा भएको १९औं एसियाली खेलकुदमा नेपालले विश्वकप खेलिसकेको जापान र भियतनाम जस्ता टोलीसँग खेल्ने अवसर पाएको थियो ।
नेपालले एएफसी वुमन्स कप भने खेलेको छैन ।
जोर्डनलाई पराजित गर्दै नेपाल पहिलो पटक महिला फुटबलको अन्तर्राष्ट्रिय उपाधि जित्ने लक्ष्यमा छ ।
यद्यपि नेपाली टोलीकी मुख्य सदस्य सावित्रा भण्डारी साम्बा भने फाइनल खेलमा उपस्थित हुने छैनन् । जारी प्रतियोगितामा एक ह्याट्रिकसहित सर्वाधिक ९ गोल गरिसकेकी सावित्रा फ्रेन्च क्लब इए गुइगाम्पको खेलका कारण फ्रान्स फर्कनु परेपछि नेपालको फाइनल खेल गुमाउने भएकी हुन् ।
युरोपियन लिग खेल्ने पहिलो नेपाली फुटबलरको इतिहास बनाएकी सावित्रा नेपाली राष्ट्रिय टिमले आफैं इतिहास बनाउन लाग्दा भने टिमसँग नहुने भएकी हुन् ।
सावित्रा नभए पनि फुटबल टिम गेम भएकोले नेपाली टिमका अन्य खेलाडीहरुका लागि अब सावित्रा जस्तै चम्कने अवसर समेत छ ।
सावित्राले समूह चरणमा सिरियाविरुद्ध १, इराकविरुद्ध ४ तथा प्यालेस्टाइनविरुद्ध २ गोल गरेकी थिइन् । यस्तै सेमिफाइनलमा लेबनानविरुद्ध १ गोल गरेकी थिइन् ।
सावित्रापछि नेपालका लागि रेखा पौडेलले २ गोल गरेकी छन् । अमिसा कार्की, अनिता बस्नेत, प्रीति राई र गीता रानाले समान एक/एक गोल गरेका छन् ।
नेपाल र जोर्डनको फाइनल यात्रा
नेपाल र जोर्डन फाइनलसम्म आइपुग्दा अपराजित छन् । दुवैले खेलेका चारै खेल जितेका छन् ।
नेपालले अहिलेसम्म १५ गोल गर्दा २ गोल बेहोरेको छ । समूह चरणमा नेपालले सिरियालाई ४-१ ले, इराकलाई ५-० ले तथा प्यालेस्टाइनलाई ४-० ले पराजित गरेको थियो ।
यस्तै सेमिफाइनलमा लेबनानविरुद्ध एक गोलले पछि पर्दै पुनरागमन गरेर २-१ ले खेल जितेको थियो ।
उता जोर्डनले जम्मा एक गोल मात्र बेहोरेको छ भने १३ गोल गरेको छ । जोर्डनले साउदी अरेबियालई ३-१ ले, ग्वामलाई ३-० र लेबनानलाई २-० ले पराजित गरेको थियो । सेमिफाइनलमा जोर्डनले प्यालेस्टाइनलाई ५-० ले पराजित गरेको थियो ।
जारी प्रतियोगितामा नेपालकी सावित्रा भण्डारीले सर्वाधिक ९ गोल गरेकी छन् । यस्तै जोर्डनकी मायसा जेबाराहले ५ तथा ग्वामकी मारिएह र लेबनानकी लिली स्कान्दरले समान तीन/तीन गोल गरेका छन् ।
