काठमाडौँ । महिला विश्वकप फुटबल प्रतियोगिताको नवौँ संस्करणअन्तर्गत इङ्ल्यान्ड र स्पेन उपाधिका लागि प्रतिस्पर्धा गर्दैछन् । फाइनल खेल अस्ट्रेलियाको सिड्नीस्थित स्टेडियममा नेपाली समयअनुसार दिउँसो ३ः४५ बजेबाट सुरु हुने भएको हो ।
घरेलु टोली अस्ट्रेलियाविरुद्ध ३-१ को जित निकाल्दै इङ्ल्यान्ड पहिलोपटक फिफा महिला विश्वकपको फाइनलमा प्रवेश गरेको हो । जितसँगै इङ्ल्यान्डले अब उपाधिका लागि स्पेनको सामना गर्नेछ । यसअघि स्पेनले स्विडेनलाई २-१ ले पराजित गर्दै फाइनलमा स्थान बनाएको थियो । यी दुवै टोली पहिलो पटक फाइनलमा पुगेका हुन् ।
यस पटक महिला विश्वकपले नयाँ विजेता पाउने भएको छ । अहिलेसम्म सबैभन्दा बढी चार पटक विश्वकप जितेको अमेरिका राउण्ड १६ मै स्विडेनसँग पराजित हुँदै बाहिरिएको थियो भने दुई पटक विश्वकप जितेको जर्मनी समूह चरणबाटै बाहिरिएको थियो । एक पटक विश्वकप जितेको नर्वे राउण्ड १६ मा जापानसँग पराजित भएर बाहिरिएको थियो भने एक पटक विश्वकप जितेको जापान क्वाटरफाइनलमा स्विडेनसँग पराजित हुँदै बाहिरिएको थियो ।
२० जुलाईबाट सुरु भएको विश्वकपमा ३२ टोलीको सहभागिता रहेको थियो । सन् १९९१ देखि सुरु महिला विश्वकपमा झण्डै ५ करोड डलर बराबरको पुरस्कार राशि बढाएर अहिले १५ करोड २० लाख डलर पुर्याइएको छ ।
