काठमाडौँ । इण्डियन प्रिमियर लिग (आइपिएल) अन्तर्गत राजस्थान रोयल्सले गुजरात टाइटन्सलाई ३ विकेटले पराजित गरेको छ । गएराती सम्पन्न खेलमा गुजरातले दिएको १७८ रनको लक्ष्य पछाएको राजस्थानले १९.२ ओभरमा ७ विकेट गुमाउँदै लक्ष्य पुरा गरेको थियो ।
राजस्थानको जितमा कप्तान सन्जु सामसनले ६० र शिमरन हेटमेयरले अविजित ५६ रन बनाएका थिए । त्यस्तै देवदत्त पाडिकलले २६, ध्रुव जुरेलले १८ र आठ आश्विनले १० रन बनाएका थिए । गुजरातका बलर मोहमद सामीले ३ विकेट लिए भने राशिद खाँले २ विकेट तथा हार्दिक पाण्डेय र नूर मोहमदले एक एक विकेट लिए ।
यसअघि टस हारेर पहिला ब्याटिङ गरेको गुजरातले २० ओभरमा ७ विकेट गुमाउँदै १७७ रन बनाएको थियो । गुजरातका लागि डेविड मिलरले सर्बाधिक ४६ रन बनाए भने शुभमन गीलले ४५ रन बनाएका थिए । त्यस्तै कप्तान हार्दिक पाण्डेयले २८ रन बनाए भने अभिनव मनोहरले २७ रनको योगदान दिएका थिए ।
साइ सुदर्सनले २०, रिद्धिमान शाहले ४ रन बनाएका थिए । राजस्थानका बलर सन्दीप शर्माले २ विकेट लिए भने ट्रेन्ट बोल्ट, एडम जाम्पा र युजवेन्द्र चहलले एक एक विकेट लिए ।
यो जितपछि राजस्थान अंक तालिकामा शीर्ष स्थानमा उक्लिएको छ । राजस्थानको ५ खेलमा ८ अंक भएको छ । त्यस्तै गुजरातको ५ खेलमा ६ अंक रहेको छ र अंक तालिकामा तेस्रो स्थानमा रहेको छ ।
