काठमाडौँ । नेपाली क्रिकेटर सन्दीप लामिछाने विरुद्धको जबरजस्ती करणीको मुद्दाको आजदेखि अन्तिम सुनुवाइ हुने भएको छ । जिल्ला अदालत काठमाडौँका न्यायाधीश माधवप्रसाद घिमिरेको इजलासमा लामिछानेको मुद्दाको पेसी तोकिएको छ ।
जिल्ला अदालत काठमाडौँका न्यायाधीश माधवप्रसाद घिमिरेको इजलासमा १४औँ नम्बरमा सन्दिप लामिछानेको पेसी परेको छ । अन्तिम तिर पेसी परेकाले आज सुनुवाइ हुन सक्ने/नसक्ने भन्ने अझै टुङ्गो लागेको छैन । सर्वोच्च अदालतले नै यो मुद्दा छिटो टुंग्याउन भन्दै जिल्ला अदालत काठमाडौँलाई आदेश दिएको थियो ।
सन्दीप लामिछाने विरुद्ध गौशाला २६ भन्ने एक किशोरीले गएको भदौ तेस्रो सातामा आफुलाई जबरजस्ती करणी गरेको आरोप लगाएकी थिइन् । त्यसको करिव एक महिनापछि सन्दीप लामिछाने पक्राउ परेका थिए । सुरुमा जिल्ला अदालत काठमाडौँले उनलाई पुर्पक्षका लागि थुनामा पठाउने आदेश दिएको थियो । तर तीन महिना भन्दा बढी थुनामा बसेपछि उच्च अदालत पाटनले काठमाडौँ जिल्ला अदालतको आदेश बदर गर्दै २० लाख रुपैयाँ धरौटीमा छाड्न आदेश दिएको थियो । त्यसपछि लगत्तै यो मुद्दा सर्वोच्च अदालतमा पुगेको थियो ।
दुवै पक्ष सर्वोच्च अदालतमा पुगेपनि सर्वोच्च अदालतले उच्च अदालत पाटनको आदेशलाई संशोधन गर्दै सन्दीप लामिछाने माथि विदेश जान लागेको प्रतिबन्ध समेत हटाउन आदेश दिएको थियो । अन्तिम सुनुवाइका क्रममा सन्दीपले सफाइ पाउने कि दोषी ठहर भएर जेल जाने भन्ने टुंगो लाग्नेछ ।
