काठमाडौं । ‘प्रेम गीत ३’ नेपाली र हिन्दी भाषामा किन हेर्ने भनेर अभिनेता प्रदीप खड्काले आफ्नो तर्क व्यक्त गरेका छन् ।
यसैक्रममा खड्काले पहिला नेपाली र त्यसपछि हिन्दी भाषाको ‘प्रेम गीत–३’ हेर्न अपिल गरेका छन् । शुक्रबारबाट देश तथा विदेशमा एकैसाथ प्रदर्शन हुन लागेको उक्त चलचित्रमा नेपाली र हिन्दी भाषामा केही फरक रहेको खड्काले सामाजिक सञ्जाल मार्फत बताएका छन् ।
बिहीबार सामाजिक सञ्जाल फेसबुकमा नेपाली र हिन्दी भाषामा केही फरक रहेको बताउदै उनले लामो स्टाटस लेखेका छन् । उनले उक्त चलचित्र नेपाली भाषामा २ घण्टा १० मिनेट र हिन्दी भाषमा २ घण्टा मात्र रहेको स्टाटस मार्फत उल्लेख गरेका छन् ।
उनले नेपाली भाषामा किन हेर्नु पर्ने भन्ने कुरालाई यसरी प्रष्ट्याएका छन्, ‘ हास्न, रून अनि पात्रसँग नजिक हुन। किनकी नेपालीमा कथाको प्रस्तुति विस्तृत रूपमा छ र त्यसकारण सानासाना घटना छुट्ने डर बिना चलचित्रलाई मनदेखि महशुस गर्दै कथा कसरी अगाडी बढ्ला भन्ने आफ्नो धारणा बनाउँदै चलचित्र हेर्न सकिन्छ।’
‘त्यसपछि हिन्दीमा हेर्नुस रोमाञ्चक अनुभूति हुन्छ । ’ खड्काले भनेका छन् । खड्का हिन्दी भाषामा किन हेर्ने भन्ने कुरामा अगाडी भन्छन्, ‘सटिक कथा प्रस्तुतिकरणको र चलचित्रको गतिले तपाईका प्रतेक इन्द्रियहरूलाई सक्रिय हुन वाध्य बनाउँछ । कथा पटकथाले दिमागलाई डेक चल्न नदिई मनको चञ्चलता निसिक्रय बनाउँछ। पत्तो नपाउँदै चलचित्र सकिएको अनुभव हुन्छ।’
दुई फरक प्रस्तुतिकरणको कारण खड्काले पहिला नेपाली र त्यसपछि हिन्दी भाषाको ‘प्रेम गीत–३’ हेर्न दर्शकलाई अपिल गरेका छन् ।
