एजेन्सी । भारतीय जनता पार्टी (बीजेपी) की बरिष्ठ नेतृ उमा भारतीले भोपालको एक मदिरा पसलमा ढुंगा हानेर तोडफोड गरेको तस्वीर र भिडियो अहिले निकै भाइरल भएको छ ।
मध्य प्रदेशकी पूर्व मुख्यमन्त्री समेत रहेकी भारतीले भोपालको बरखेडा पठानी आजाद नगरको एक मदिरा पसलमा ढुंगा हानेर रक्सीका बोतल फुटाएकी हुन् । सो क्षेत्रमा धेरै मन्दिरहरु र विद्यालय पनि रहेको त्यहाँबाट रक्सी पसल हटाउन उनले चेतावनी समेत दिएकी छिन् । मदिरा पिएका मानिसहरुले घरको छतमा महिलाहरु निस्किदा अश्लील क्रियाकलाप गरेर दुःख समेत दिने गरेका गुनासा समेत सुनिन थालेपछि उनी त्यहाँ पुगेकी हुन् ।
सो क्षेत्रमा मजदुर कोलनी पनि भएकाले धेरै मदिरा बिक्रि हुने गरेको भारतीय संचार माध्यमहरुले जनाएका छन् । उनले मदिराले सबैलाई बिगारेको भन्दै पसल नहटाए आन्दोलन गर्ने पनि बताएकी छिन् । उनले उक्त घटनालाई लिएर ट्वीट पनि गरेकी छिन् भने त्यो भिडियो निकै भाइरल पनि भएको छ ।
