सुर्खेत । पार्टीको ह्वीप विपरित ‘फ्लोर क्रस’ गरेर माओवादी नेतृत्वको सरकारलाई जोगाउन लागेका कर्णालीका चारजना सांसदको पद औपचारिक रुपमा गएको छ ।
एमालेको निर्देशन विपरीत मुख्यमन्त्री महेन्द्रबहादुर शाहीलाई विश्वासको मत उनीहरुले दिएका थिए । सांसद पद जानेमा प्रकाश ज्वाला, अम्मरबहादुर थापा, कुर्मराज शाही र नन्दसिंह बुढा रहेका छन् ।
प्रकाश ज्वाला बाहेक अन्य तीन जनालाई मुख्यमन्त्री महेन्द्रबहादुर शाहीले मन्त्री पदमा नियुक्त गरिसकेका छन् ।
यसअघि आईतबार एमाले संसदीय दलले चार सांसदले दल त्याग गरेको सूचना प्रदेशसभामा दर्ता गरेको थियो । सो पत्र सोमबार प्रदेश सभामा सुनाउँदै सभामुख शाहीले चार सांसदको पद रिक्त रहेको बताएका हुन् ।
माओवादीले पनि आफ्ना एक जना सांसदलाई कारबाही गरिसकेको छ । अब कर्णाली प्रदेश सभामा सांसदहरुको संख्या ३७ रहेको छ ।
