काठमाडौं । सिन्धुपाल्चोकको मेलम्ची नदीको पानी २० वर्षपछि पहिलो पटक काठमाडौंमा आइपुगेको छ । वि.सं.२०५६ मा सुरु भएको मेलम्ची खानेपानी आयोजनाको निर्माण सुरु गरिएको दुई दशकपछि शनिबार पहिलो पटक मेलम्चीको पानी सुन्दरीजलस्थित पानी संकलन केन्द्रमा खसालिएको हो ।
साढे २६ किलोमिटर लामो सुरुङमार्ग हुँदै आएको पानी सुन्दरीजलमा जलप्रवाह गर्ने कार्यक्रमको आज प्रधानमन्त्री केपी शर्मा ओलीले शुभारम्भ गर्नुभयो । सिन्धुपाल्चोकको मेलम्चीस्थित मुहानबाट सुरु हुने सुरुङमा फागुन १० गते पानी पठाइएको थियो ।
सुरुङ भरिएर आएको पानीलाई आज सुन्दरीजलमा खसालिए पनि पहिलो पटकको पानी फोहोर हुने भएकाले बाग्मती नदीमा पठाइएको छ । अहिले परीक्षणका लागि प्रतिसेकेण्ड २६० लिटर पानी मात्रै सुरुङमा हालिएको हो । सबै परीक्षण सम्पन्न भएपछि प्रतिदिन १७ करोड लिटर पानी सुन्दरीजलमा आइपुग्ने छ ।
सुन्दरीजलमा निर्माण गरिएका प्रशोधन केन्द्रमा पानी प्रशोधन गरेपछि मात्रै राजधानीवासीका घर–घरमा पानी वितरण गरिने छ । यद्यपि सुरुङको सफाइ र मर्मतको काम बाँकी रहेकाले घर–घरमा पानी वितरण गर्न भने अझै तीन महिना लाग्ने मेलम्ची खानेपानी आयोजनाले जनाएको छ ।
जलप्रवाह कार्यक्रमलाई सम्बोधन गर्दै प्रधानमन्त्री ओलीले मेलम्चीको पानी काठमाडौंमा आइपुगेको दिन खुशीको दिन भएकाले घर–घरमा दीपावली गर्न आग्रह गर्नुभएको छ । सरकारले विकास र रणनीतिक महत्त्वका ठूला आयोजना अघि बढाएकाले केही आफ्नै पार्टीका मानिसहरू आफूविरुद्ध लागेको उहाँको भनाइ छ
