गृहमन्त्री रामबहादुर थापा ‘बादल’ले २०७५ सालमा सरकारी बिदा कटौती गर्ने बताएका छन्।
नेपाल चेम्बर अफ कमर्सको प्रतिनिधिमण्डलसँगको भेटमा उनले बिदा कटौतीबारे केही दिन भित्रै निर्णय हुने बताएका हुन्। चेम्बरको प्रतिनिधिमण्डलले सार्वजनिक बिदा घटाउन गृहमन्त्रीसँग माग गरेका थिए।
गृहमन्त्री बादलले जवाफमा आगामी वर्षका लागि अहिले दिँदै आएको २० दिनभन्दा बढी बिदा कटौती गर्न लागिएको बताएका हुन्।
चेम्बरका प्रतिनिधिहरूले चन्दाका लागि धम्की दिने समूह र व्यक्तिलाई कारवाही गर्नुपर्ने, सार्वजनिक बिदा घटाउनुपर्ने, धेरै ठाउँमा सामान खानतलासी नगरी निश्चित ठाउँमा मात्रै गरिनुपर्ने लगायतका माग गृहमन्त्रीसँग राखेका थिए।
