कैलाली,/ सुदूरपश्चिम प्रदेशका मुख्यमन्त्री त्रिलोचन भट्टविरुद्ध पनि अविश्वास प्रस्ताव दर्ता हुन सक्ने देखिएको छ । नेकपा ओली समूहले मुख्यमन्त्री भट्ट विरुद्ध अविश्वास प्रस्ताव ल्याउने तयारी थालेको बताइएको छ । मुख्यमन्त्री भट्ट नेकपा प्रचण्ड–माधव समूहमा रहेका छन् ।
सुदूरपश्चिम प्रदेश सभाको हिँउदे अधिवेशन आज (सोमबार) देखि सुरु हुँदै छ । गत जेठ १३ गते प्रदेशकाे बजेट अधिवेशन सुरु भएर भदौ ३१ गते सकिएको थियो । एउटा अधिवेशन अन्त्य भएको ६ महिनाभित्र अर्को अधिवेशन सुरु गरिसक्नुपर्ने भएकाले आजबाट हिउँदे अधिवेशन बोलाइएको हो ।
आजको प्रदेश सभा बैठकमा तीनवटा विधेयक पेश हुने बताइएको छ । प्रदेशको भूमि व्यवस्था, कृषि तथा सहकारी मन्त्रालयले तयार गरेका तीनवटा विधेयक प्रदेश सभामा यसअघि नै दर्ता गराइसकिको छ ।
यसैबीच अल्पमतमा रहेको नेकपा ओली समूहले मुख्यमन्त्री हटाउने योजना बनाइरहेको विशेष स्रोतले जनाएको छ । प्रदेश सरकारबाट बाहिरिसकेको ओली पक्षले प्रतिपक्षी दल नेपाली कांग्रेससँग मिलेर मुख्यमन्त्री भट्टविरुद्ध अविश्वासको प्रस्ताव ल्याउने तयारी गरेको स्रोतको दाबी छ ।
हाल सुदूरपश्चिम प्रदेश सभामा ५३ जना सांसद छन् । तीमध्ये नेकपाका मात्रै ३९ जना रहेका भए पनि ओली समूहमा ७ जना मात्रै रहेको बताइन्छ । बाँकी नेकपा प्रचण्ड–माधव समूहमा रहेका छन् । उता नेपाली कांग्रेसका १२ जना सांसद र जनता समाजवादी पार्टीका २ जना सांसद रहेका छन् । हालको अवस्थामा मुख्यमन्त्री विरुद्ध अविश्वास ल्याइहालेमा पनि प्रतिपक्षी दलका सांसद मिल्दा पनि बहुमत पुग्नेचाहिँ देखिँदैन ।
यसअघि बाग्मती प्रदेश र प्रदेश- १ का मुख्यमन्त्रीहरू विरूद्ध नेकपा प्रचण्ड-माधव समूहले अविश्वास प्रस्ताव दर्ता गराइसकेका छन् ।
