एजेन्सी । साढे तीन दशकसम्म नर्वेको अभिभावकत्व सम्हालेका राजा हेराल्ड पाँचौँलाई बुधबार राजधानी ओस्लोमा राजकीय सम्मानका साथ अन्तिम बिदाइ गरिएको छ।
ओस्लो क्याथेड्रलमा आयोजित विशेष अन्त्येष्टि समारोहमा आफ्ना प्रिय राजाको बिदाइमा हजारौँ नर्वेजियन नागरिक सडकमा आँसु पुछ्दै उभिएका थिए भने युरोपका राजपरिवार र विश्वका शीर्ष नेताहरूले श्रद्धावनत भएर उनलाई अन्तिम सम्मान अर्पण गरे।
दिउँसो राजदरबारबाट निकालिएको राजाको पार्थिव शरीरलाई विशेष तोपगाडीमा राखेर ओस्लोको मुख्य सहर हुँदै क्याथेड्रलतर्फ लगिँदा राजधानीको वातावरण स्तब्ध र भावुक बनेको थियो। सडकका दायाँबायाँ हातमा राष्ट्रिय झण्डा र फूल लिएर उभिएका सर्वसाधारण आफ्ना ‘जनताका राजा’लाई हेर्दै मौन बिदाइ गरिरहेका थिए।
शवयात्रामा नवनियुक्त राजा हाकोन आठौँ, युवराज्ञी इनग्रिड अलेक्जान्ड्रासहित राजपरिवारका सदस्यहरू गम्भीर मुद्रामा सहभागी थिए। युरोपेली राजतन्त्रका निकटवर्ती मानिने छिमेकी मुलुक डेनमार्कका राजा फ्रेडरिक र रानी मेरी, स्विडेनका राजा कार्ल सोह्रौँ गुस्ताफ, स्पेनका राजा फेलिप तथा नेदरल्यान्ड्सका राजा विलेम-अलेक्ज्याण्डर आफ्ना अग्रज राजाको अन्त्येष्टिमा सहभागी हुन ओस्लो पुगेका थिए ।
त्यस्तै, युद्धग्रस्त मुलुक युक्रेनका राष्ट्रपति भोलोदिमिर जेलेन्स्की र फिनल्यान्डका राष्ट्रपति अलेक्ज्याण्डर स्टबसहितका विश्व नेताहरूले पनि समारोहमा उपस्थित भएर राजा हेराल्डप्रति अन्तिम श्रद्धाञ्जली व्यक्त गरे ।
स्थानीय समयअनुसार दिउँसो ठीक १ बजे सिङ्गो देश एक मिनेट मौनतामा डुब्यो। मौनधारणको सुरु र अन्त्यमा देशैभरिका चर्चका घण्टीहरू तीन पटक बजाइएका थिए। क्याथेड्रलमा आयोजित प्रार्थना सभामा संसद्का अध्यक्ष मसुद घाराखानी र प्रधानमन्त्री योनास गार स्टोरले राजा हेराल्डले नर्वेलाई एकताबद्ध, खुला र आधुनिक बनाउन खेलेको ऐतिहासिक भूमिकाको स्मरण गरे।
विभिन्न धर्म र सम्प्रदायका प्रतिनिधिहरूले दिवंगत राजाको आत्माको शान्तिका लागि दीप बालेर सामूहिक प्रार्थना गरेका थिए। सार्वजनिक अन्त्येष्टि औपचारिकता सकिएपछि राजाको कफिनलाई ऐतिहासिक अकेर्सहुस किल्लास्थित ‘प्यालेस च्यापेल’ मा पुर्याइनेछ, जहाँ राजपरिवारका निकट सदस्यहरूको उपस्थितिमा निजी पारिवारिक धार्मिक अनुष्ठानपछि उनलाई शाही समाधिस्थल (रोयल क्रिप्ट) मा समाधिस्थ गरिनेछ।
सन् १९९१ मा गद्दी सम्हालेपछि ३५ वर्षसम्म नर्वेलाई शान्त र सबल नेतृत्व दिएका राजा हेराल्डको गत अगस्ट २८ मा ८९ वर्षको उमेरमा अस्पतालमा निधन भएको थियो। उनको अवसानसँगै अब नर्वेको शाही विरासत र नयाँ युगको जिम्मेवारी उनका ५३ वर्षीय छोरा राजा हाकोन आठौँको काँधमा आइपुगेको छ।
