काठमाडौँ । कञ्चनपुर उद्योग वाणिज्य सङ्घका अध्यक्ष दिनेश मल्लले स्वर्गीय आमाको स्मृतिमा बाढीपीडितको उद्धार तथा राहतका लागि प्रधानमन्त्री दैवी प्रकोप उद्धार कोषमा रु. ५ लाख ११ हजार १११ सहयोग गर्नुभएको छ ।
प्राकृतिक विपद्का बेला रसुवाको भोटेकोशी नदीमा आएको बाढीबाट प्रभावित नागरिकको उद्धार तथा राहत कार्यमा सहयोग पुर्याउने उद्देश्यले मल्लले स्वर्गीय आमाको स्मृतिमा स्थापित राजुदेवी मल्ल स्मृति प्रतिष्ठानमार्फत उक्त रकम कोषमा जम्मा गर्नुभएको हो ।
बाढीका कारण ठूलो जनधनको क्षति भएको तथा धेरै नागरिक प्रभावित भएको अवस्थामा राहत तथा उद्धार कार्यमा सहयोग पुर्याउने उद्देश्यले रकम प्रदान गरिएको मल्लले बताउनुभएको छ ।
सामाजिक उत्तरदायित्वलाई प्राथमिकतामा राख्दै मल्लले विभिन्न विपद् तथा सङ्कटका समयमा सहयोग गर्दै आउनुभएको छ । यसअघि कोरोना भाइरसको महामारीका समयमा पनि उहाँले नागरिकको स्वास्थ्य सुरक्षाका लागि विभिन्न सहयोग गर्नुभएको थियो ।
कोभिड–१९ महामारीका बेला उहाँको पहलमा महाकाली प्रादेशिक अस्पतालमा अक्सिजनको व्यवस्था गरिएको थियो । अक्सिजनको अभावमा उपचार प्रभावित भइरहेका बेला अस्पतालमा अक्सिजन उपलब्ध गराउन उहाँले सक्रिय भूमिका निर्वाह गर्नुभएको थियो ।
त्यस्तै, कोरोना महामारीको पहिलो चरणमा भारतबाट गड्डाचौकी नाका हुँदै स्वदेश फर्किएका नेपाली नागरिकका लागि मल्लले भोजनको व्यवस्थासमेत गर्नुभएको थियो । महामारीका कारण रोजगारी तथा आम्दानी गुमाएर स्वदेश फर्किएका नागरिकलाई सीमाक्षेत्रमै भोजन उपलब्ध गराउने कार्यमा उहाँको पहल रहेको थियो ।
पछिल्ला केही वर्षयता राजुदेवी मल्ल स्मृति प्रतिष्ठानमार्फत विभिन्न सामाजिक क्षेत्रमा सहयोग गर्दै आउनुभएका मल्लले विपद्का समयमा प्रभावित नागरिकलाई राहत उपलब्ध गराउन सबै पक्ष एकजुट हुनुपर्नेमा जोड दिनुभएको छ ।
उहाँले प्राकृतिक विपद्का कारण पीडामा परेका नागरिकलाई तत्काल राहत र उद्धारको आवश्यकता पर्ने भएकाले सक्षम व्यक्ति, व्यवसायी, सङ्घसंस्था तथा आम नागरिकले आ–आफ्नो क्षमताअनुसार सहयोग गर्नुपर्ने बताउनुभएको छ ।
भोटेकोशी बाढीपछि प्रभावित क्षेत्रमा बेपत्ता नागरिकको खोजी, जोखिममा परेकाको उद्धार, विस्थापित परिवारको व्यवस्थापन तथा राहत वितरणका कार्य भइरहेका छन् । यस्तो अवस्थामा विभिन्न व्यक्ति तथा संस्थाबाट प्रधानमन्त्री दैवी प्रकोप उद्धार कोषमा सहयोग जुट्ने क्रमसमेत बढेको छ ।
मल्लको सहयोगले स्वर्गीय आमाको स्मृतिलाई सामाजिक सेवासँग जोड्दै विपद्मा परेका नागरिकको उद्धार र राहतमा योगदान गर्ने उदाहरण प्रस्तुत गरेको छ ।
