एजेन्सी । भारतको ओडिशास्थित पारादीप तटबाट करिब २४० समुद्री माइल टाढा बंगालको खाडीमा शनिबार ‘एमभी ओसन विनर’ नामक मालवाहक जहाज डुबेको छ।
पनामाको झण्डा रहेको उक्त जहाजमा २४ जना चालक दलका सदस्य सवार थिए। भारतीय अधिकारीका अनुसार चालक दलमा २० जना चिनियाँ, तीनजना म्यान्मारका र एकजना बंगलादेशी नागरिक थिए।
जहाज डुबेपछि हालसम्म दुई जनाको उद्धार गरिएको छ भने बाँकी २२ जनाको खोजी तथा उद्धार कार्य जारी रहेको भारतीय सञ्चारमाध्यमले जनाएका छन्।
उक्त जहाज पारादीप बन्दरगाहबाट फलाम बोकेर सिंगापुरतर्फ जाँदै थियो। जहाज अगस्ट २० तारिख राति पारादीपबाट प्रस्थान गरेको थियो। केही समयपछि जहाजसँग सम्पर्क विच्छेद भएपछि उद्धारका लागि सूचना प्राप्त भएको थियो।
घटनापछि भारतीय तटरक्षक बल र भारतीय नौसेनाले संयुक्त रूपमा खोजी तथा उद्धार अभियान सुरु गरेका छन्। नजिकै रहेका अन्य जलपोतलाई समेत घटनाबारे जानकारी गराउँदै उद्धार कार्यमा सहयोग गर्न आग्रह गरिएको छ।
उद्धार टोलीले लाइफर्याफ्टमा रहेका दुई जनालाई सुरक्षित उद्धार गरेको छ। जहाज डुब्नुको कारण भने अहिलेसम्म खुल्न सकेको छैन।
