काठमाडौं । काठमाडौंको बुद्धनगरमा आत्मदाहको प्रयास गरेका व्यवसायी आश्विन राउतको उपचारका क्रममा निधन भएको छ। शनिबार बिहान आफ्नै घरको भान्सामा शरीरमा आगो लगाएका ४५ वर्षीय राउतको वीर अस्पतालमा उपचारकै क्रममा मृत्यु भएको हो।
प्रहरीका अनुसार राउतले बिहान आफ्नै शरीरमा आगो लगाएपछि घटनाबारे जानकारी प्राप्त हुनासाथ प्रहरी टोली घटनास्थल पुगेको थियो। गम्भीर अवस्थामा रहेका उनलाई तत्काल उद्धार गरी वीर अस्पताल पुर्याइएको थियो।
वीर अस्पतालमा उनको सघन उपचार कक्ष (आईसीयू) मा राखेर उपचार भइरहेको थियो। चिकित्सकका अनुसार उनको शरीरको ५० प्रतिशतभन्दा बढी भाग जलेको थियो। गम्भीर जलनका कारण स्वास्थ्य अवस्था लगातार जटिल बन्दै गएपछि उपचारकै क्रममा उनको निधन भएको हो।
प्रारम्भिक अनुसन्धानअनुसार राउतले किन आत्मदाहको प्रयास गरे भन्ने कारण अझै खुल्न सकेको छैन। घटनाको वास्तविक कारण पत्ता लगाउन प्रहरीले परिवारका सदस्य, आफन्त तथा अन्य सम्बन्धित व्यक्तिसँग सोधपुछ गरिरहेको जनाएको छ।
जिल्ला प्रहरी परिसर काठमाडौंका एसपी पवन भट्टराईले घटनाको कारणबारे विस्तृत अनुसन्धान भइरहेको जानकारी दिएका छन्। अनुसन्धानबाट प्राप्त तथ्यका आधारमा घटनाको वास्तविक कारण सार्वजनिक गरिने प्रहरीले जनाएको छ।
पछिल्ला केही दिनयता आत्मदाहका घटनाले समाजमा गम्भीर चिन्ता उत्पन्न गरिरहेका बेला बुद्धनगरको यो घटनाले पनि मानसिक स्वास्थ्य, पारिवारिक अवस्था तथा सामाजिक परिस्थितिबारे थप बहसको आवश्यकता औंल्याएको छ। प्रहरीले घटना सम्बन्धी सबै पक्षको अनुसन्धान जारी रहेको जनाएको छ।
