सुर्खेत – कर्णाली प्रदेशमा सम्पन्न निर्वाचनको समानुपातिकतर्फको अन्तिम मतपरिणाम सार्वजनिक भएको छ। प्रदेश निर्वाचन कार्यालय कर्णालीले उपलब्ध गराएको विवरणअनुसार नेपाली कांग्रेस समानुपातिकतर्फ पनि पहिलो स्थानमा रहेको छ।
अन्तिम मतपरिणामअनुसार नेपाली कांग्रेसले एक लाख ४१ हजार २३३ मत प्राप्त गर्दै कर्णाली प्रदेशमा सबैभन्दा बढी मत ल्याएको छ। प्रत्यक्षतर्फ पाँच सिट जित्दै पहिलो बनेको कांग्रेसले समानुपातिकतर्फ पनि आफ्नो अग्रता कायम राख्न सफल भएको हो।
कर्णाली प्रदेशभर प्रत्यक्षतर्फ एक सिट मात्रै जितेको राष्ट्रिय स्वतन्त्र पार्टी (रास्वपा) समानुपातिकतर्फ भने दोस्रो स्थानमा रहेको छ। रास्वपाले एक लाख ३३ हजार ७४९ मत प्राप्त गरेको प्रदेश निर्वाचन कार्यालयले जनाएको छ।
यसैगरी नेकपा (एमाले) ले एक लाख २० हजार ८६३ मत प्राप्त गर्दै तेस्रो स्थान हासिल गरेको छ। त्यस्तै नेपाली कम्युनिष्ट पार्टी (नेकपा) ले एक लाख सात हजार १०१ मत प्राप्त गरेको छ।
अन्य दलहरूमध्ये राष्ट्रिय प्रजातन्त्र पार्टी (राप्रपा) ले १५ हजार ७५५ मत प्राप्त गरेको छ भने प्रगतिशील लोकतान्त्रिक पार्टी ले ८ हजार ५३७ मत प्राप्त गरेको छ।
त्यसैगरी नेपाल मजदुर किसान पार्टी ले ५ हजार १३० मत ल्याएको छ। कर्णाली प्रदेशबाट श्रम संस्कृति पार्टी ले समानुपातिकतर्फ ४ हजार ६७५ मत प्राप्त गरेको प्रदेश निर्वाचन कार्यालयले जनाएको छ।
समानुपातिकतर्फ प्राप्त मतका आधारमा कर्णाली प्रदेशसभामा दलहरूको प्रतिनिधित्व तय हुने भएकाले यो परिणामले प्रदेशको आगामी राजनीतिक समीकरण र शक्ति सन्तुलनमा प्रभाव पार्ने देखिएको छ।
