काठमाडौं । हाल देशमा पश्चिमी वायुको आंशिक प्रभाव कायम रहेको र तराईका केही स्थानमा तुवाँलो लागेको जल तथा मौसम विज्ञान विभाग ले जनाएको छ । विभागका अनुसार गण्डकी, कर्णाली र सुदूरपश्चिम प्रदेशका उच्च पहाडी तथा हिमाली भागमा आंशिक बदली रही बाँकी भू–भागमा मौसम सामान्यतया सफा रहेको छ ।
आज दिउँसो तराईका केही स्थानमा हुस्सु रहने सम्भावना रहेको छ भने हिमाली भागमा साधारणतया बदली रहनेछ । पहाडी भागमा आंशिक बदली र बाँकी भू–भागमा मौसम सफा रहने पूर्वानुमान गरिएको छ । यस अवधिमा गण्डकी, कर्णाली र सुदूरपश्चिम प्रदेशका पहाडी तथा हिमाली भू–भागका केही स्थानमा, साथै बाँकी पहाडी र हिमाली क्षेत्रका एक–दुई स्थानमा हल्का वर्षा तथा हिमपातको सम्भावना रहेको विभागले जनाएको छ ।
त्यसैगरी, आज राति तराईका केही स्थानमा तुवाँलो लागिरहने सम्भावना छ । कोशी, बागमती र गण्डकी प्रदेशलगायत बाँकी हिमाली भू–भागमा बदली रहनेछ भने मधेस प्रदेश तथा बाँकी पहाडी भागमा आंशिक बदली र अन्य भू–भागमा मौसम सफा रहने पूर्वानुमान गरिएको छ । रातिको समयमा पनि कोशी, बागमती र गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा र हिमपात हुन सक्ने बताइएको छ ।
तराईका केही स्थानमा हुस्सु र तुवाँलो लाग्ने तथा गण्डकी, कर्णाली र सुदूरपश्चिम प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा र हिमपातको सम्भावना रहेकाले यातायात सञ्चालनमा असर पर्न सक्ने, साथै कृषिकर्म र दैनिक जनजीवन प्रभावित हुन सक्ने विभागले जनाएको छ । यस कारण सर्वसाधारण, किसान तथा सरोकारवाला सबैलाई आवश्यक सतर्कता अपनाउन महाशाखाले अनुरोध गरेको छ ।
