काठमाडौं । शेयर बजार लगातार तेस्रो कारोबार दिन पनि ओरालो लागेको छ । दिनभरको उतार–चढावपछि बजार परिसूचक नेप्से १०.२५ अंकले घट्दै २६६२.१४ विन्दुमा झरेको छ ।
नेप्सेसँगै कारोबार रकममा पनि गिरावट आएको छ । नेप्सेमा सूचीकृत १३ उपसमूहमध्ये म्युचुअल फण्ड र व्यापार उपसमूहको परिसूचक सामान्य वृद्धि भए पनि बाँकी ११ उपसमूहको परिसूचक घटेको छ । सबैभन्दा बढी विकास बैंक उपसमूह १.१५ प्रतिशतले ओरालो लागेको छ ।
यस दिन १ सय ७९ कम्पनीको शेयर मूल्य घट्दा ७४ कम्पनीको शेयर मूल्य बढेको छ ।
घटेको बजारमा पनि कालिञ्चोक दर्शन लिमिटेड र अरुण भ्याली जलविद्युत कम्पनीका लगानीकर्ताले क्रमशः ६ प्रतिशतभन्दा बढी र ५ प्रतिशतभन्दा बढी नाफा कमाएका छन् । यता, कर्पोरेट विकास बैंकका लगानीकर्ताले भने सबैभन्दा बढी करिब ५ प्रतिशत नोक्सानी व्यहोरेका छन् ।
आज ३२४ वटा स्टकको कुल २ करोड १७ लाख १५ हजार कित्ता शेयर ८ अर्ब ६१ करोड ६४ लाख १० हजार रुपैयाँ बराबरमा खरिद–बिक्री भएको छ ।
कारोबार रकमका आधारमा अरुण भ्याली हाइड्रोपावर कम्पनी अग्रस्थानमा रहँदै ४५ करोड २८ लाख रुपैयाँ बराबरको शेयर कारोबार भएको छ । यस्तै, आँखुखोला जलविद्युत कम्पनीको करिब ४० करोड ५० लाख र रिडी पावर कम्पनीको करिब ३८ करोड ५० लाख रुपैयाँ बराबरको शेयर कारोबार भएको छ ।
