काठमाडौं । देशभर जारी अविरल वर्षा, बाढी र पहिरोका कारण विभिन्न जिल्लाका प्रमुख राजमार्ग तथा सडकखण्डमा सवारी आवागमन प्रभावित भएको छ। नेपाल प्रहरीले शनिबार बिहान ५ः०० बजेसम्मको अद्यावधिक विवरण सार्वजनिक गर्दै केही सडक पूर्ण रूपमा अवरुद्ध भएको र केही सडकमा जोखिमका कारण रात्रिकालीन सवारी सञ्चालनमा प्रतिबन्ध लगाइएको जनाएको छ।
प्रहरीका अनुसार निरन्तर वर्षाका कारण नदी तथा खोलामा पानीको बहाव बढ्नुका साथै पहिरो खस्ने जोखिम उच्च रहेकाले यात्रु र सवारीसाधनको सुरक्षालाई ध्यानमा राख्दै केही स्थानमा सावधानीस्वरूप यातायात सञ्चालनमा समय तोकिएको हो।
बिपी राजमार्गमा राति सवारी सञ्चालन रोक
काभ्रेपलाञ्चोक र सिन्धुली जोड्ने बिपी राजमार्ग अन्तर्गत खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई मध्यनजर गर्दै बेलुका ६ः०० बजेदेखि बिहान ४ः०० बजेसम्म सबै प्रकारका सवारीसाधन सञ्चालनमा रोक लगाइएको छ। उक्त समयमा यात्रा नगर्न र वैकल्पिक योजना बनाउन प्रशासनले अनुरोध गरेको छ।
कान्तिलोकपथमा पनि रात्रिकालीन प्रतिबन्ध
त्यसैगरी, कान्तिलोकपथमा पनि वर्षायामको जोखिमलाई ध्यानमा राख्दै बेलुका ५ः०० बजेदेखि बिहान ५ः०० बजेसम्म सबै प्रकारका सवारीसाधन सञ्चालनमा पूर्ण प्रतिबन्ध लगाइएको छ।
इलाममा मेची राजमार्ग पूर्ण अवरुद्ध
इलाम नगरपालिका–९ अन्तर्गत पर्ने मेची राजमार्गमा लगातारको वर्षापछि सडक हिलाम्मे बनेका कारण सवारीसाधन सञ्चालन पूर्ण रूपमा बन्द भएको प्रहरीले जनाएको छ। सडक मर्मत र मौसममा सुधार आएपछि मात्रै यातायात सञ्चालन गरिने अपेक्षा गरिएको छ।
अरनिको राजमार्गमा पहिरो
सिन्धुपाल्चोकको भोटेकोशी गाउँपालिकास्थित अरनिको राजमार्गको जिरोकिलो र कोदारी क्षेत्रमा पहिरो खसेपछि सडक पूर्ण रूपमा अवरुद्ध भएको छ। पहिरो पन्छाउने काम भइरहेको भए पनि थप वर्षाका कारण तत्काल सञ्चालनमा ल्याउन कठिनाइ भइरहेको जनाइएको छ।
दोलखामा सडक कटान
दोलखाको तामाकोशी गाउँपालिका–५ किर्नेटारस्थित लामासाँघु–रामेछाप सडकखण्डमा सामाकोशी खोलाको बहाव बढेर सडक कटान गरेपछि उक्त सडकमा पनि सवारी आवागमन पूर्ण रूपमा बन्द भएको छ।
रसुवामा पासाङ ल्हामु सडकखण्ड अवरुद्ध
रसुवाको उत्तरगया गाउँपालिका–५ खाल्टेस्थित पासाङ ल्हामु राजमार्गमा त्रिशूली नदीले सडक कटान गरेपछि उक्त सडकखण्ड पनि पूर्ण रूपमा अवरुद्ध भएको प्रहरीले जनाएको छ।
यात्रुहरूलाई सतर्क रहन आग्रह
नेपाल प्रहरीले वर्षायाममा पहिरो, बाढी, डुबान र सडक कटानको जोखिम अझै उच्च रहेकाले अत्यावश्यक कामबाहेक जोखिमयुक्त क्षेत्रमा यात्रा नगर्न आग्रह गरेको छ। यात्रा गर्नैपर्ने अवस्थामा सम्बन्धित जिल्ला प्रशासन, ट्राफिक प्रहरी वा सडक विभागबाट सडकको पछिल्लो अवस्थाबारे जानकारी लिएर मात्रै यात्रा गर्न अनुरोध गरिएको छ।
प्रहरीले नदी किनार, पहिरोको जोखिम भएका क्षेत्र तथा कमजोर सडक संरचना भएका स्थानमा विशेष सतर्कता अपनाउन र मौसम पूर्वानुमानलाई निरन्तर पछ्याउन सबै नागरिकलाई आग्रह गरेको छ। साथै, सडक खुलाउने कार्य सम्बन्धित निकायले तीव्र रूपमा अघि बढाइरहेको जनाएको छ।
