काठमाडौं । आईसीसी क्रिकेट विश्वकप लिग–२ को तयारीमा रहेको नेपाली राष्ट्रिय क्रिकेट टोलीले अभ्यास खेलमा उत्कृष्ट प्रदर्शन गर्दै जर्सीलाई ८१ रनको फराकिलो अन्तरले पराजित गरेको छ। सोमबार राति जर्सीको ग्रेनभिलमा सम्पन्न एकदिवसीय अभ्यास खेलमा नेपालले ब्याटिङ र बलिङ दुवै विभागमा सन्तुलित प्रदर्शन गर्दै प्रभावशाली जित दर्ता गरेको हो।
टस हारेर पहिले ब्याटिङको निम्तो पाएको नेपालले निर्धारित ५० ओभरमा ८ विकेट गुमाउँदै २५० रनको प्रतिस्पर्धात्मक योगफल तयार गरेको थियो। नेपालको इनिङ्समा ओपनर कुशल भुर्तेल चम्किए। उनले संयमित र आकर्षक ब्याटिङ गर्दै १०५ रनको शतकीय इनिङ्स खेलेर टोलीलाई बलियो अवस्थामा पुर्याए। यो अभ्यास खेलमा उनको शतकले आगामी लिग–२ शृङ्खलाअघि नेपाली टोलीको आत्मविश्वास बढाएको छ।
मध्यक्रममा भीम सार्की ले ३९ रनको महत्वपूर्ण योगदान दिए। अन्य ब्याटरहरूले पनि आवश्यक समयमा उपयोगी रन जोड्दै नेपाललाई २५० रनसम्म पुर्याउन सहयोग गरे।
२५१ रनको लक्ष्य पछ्याएको जर्सीले सुरुआतदेखि नै नेपाली बलरहरूको दबाब झेल्नुपर्यो। नियमित अन्तरालमा विकेट गुमाएको जर्सी ४१ ओभरमै १६९ रनमा अलआउट भयो।
जर्सीका लागि चार्ली ब्रेनन ले अविजित ८२ रन बनाए पनि उनलाई अन्य ब्याटरबाट पर्याप्त साथ मिल्न सकेन। डानियल बिरेल ले ४१ रनको योगदान दिए पनि टोलीलाई हारबाट जोगाउन त्यो पर्याप्त भएन।
नेपालको बलिङतर्फ हेमन्त धामी सर्वाधिक सफल रहे। उनले उत्कृष्ट बलिङ गर्दै ४ विकेट लिए। आरिफ शेख ले ३ विकेट हात पारे भने करण केसी र सन्दीप लामिछाने ले समान १–१ विकेट लिए। नेपाली बलरहरूले सुरुदेखि नै लाइन–लेन्थमा अनुशासित प्रदर्शन गर्दै जर्सीलाई ठूलो साझेदारी बनाउन दिएनन्।
यो जितसँगै नेपालले आईसीसी क्रिकेट विश्वकप लिग–२ को तयारीलाई सकारात्मक सुरुआत दिएको छ। टोलीले अब बुधबार दोस्रो अभ्यास खेल खेल्ने तालिका रहेको छ।
त्यसपछि नेपाली टोली आईसीसी क्रिकेट विश्वकप लिग–२ अन्तर्गत नेदरल्यान्ड्समा आयोजना हुने त्रिदेशीय शृङ्खला खेल्न जानेछ। उक्त शृङ्खलामा नेपालले घरेलु टोली नेदरल्यान्ड्स र नामिबिया विरुद्ध प्रतिस्पर्धा गर्नेछ।
आगामी लिग–२ शृङ्खला नेपालको विश्वकप छनोट यात्राका लागि महत्वपूर्ण मानिएको छ। अभ्यास खेलमा देखिएको ब्याटिङ र बलिङको सन्तुलित प्रदर्शनलाई निरन्तरता दिन सके नेपालले त्रिदेशीय शृङ्खलामा पनि राम्रो नतिजा निकाल्ने अपेक्षा गरिएको छ।
