काठमाडौं । आत्मदाहपछि उपचारका क्रममा ज्यान गुमाएका मुगुका गणेश नेपालीको न्यायको माग गर्दै शनिबार काठमाडौंस्थित वीर अस्पताल अगाडि प्रदर्शन गरिएको छ। मृतकका आफन्त तथा समर्थकहरूले सरकार र सत्तारुढ पक्षविरुद्ध नाराबाजी गर्दै घटनाको निष्पक्ष छानबिन र दोषीमाथि कारबाहीको माग गरेका हुन्।
प्रदर्शनका क्रममा सहभागीहरूले सरकारप्रति असन्तुष्टि व्यक्त गर्दै विभिन्न नाराबाजी गरेका थिए। उनीहरूले काठमाडौं महानगरपालिकाका प्रमुख बालेन्द्र (बालेन) शाह तथा राष्ट्रिय स्वतन्त्र पार्टी (रास्वपा) का सभापति रवि लामिछानेको नाम उल्लेख गर्दै पनि विरोध प्रदर्शन गरेका थिए।
प्रदर्शन प्रारम्भमा शान्तिपूर्ण रूपमा अघि बढे पनि सहभागीहरू सडकमा उत्रिन खोजेपछि केहीबेर स्थिति तनावग्रस्त बनेको थियो। सडक अवरुद्ध हुन सक्ने अवस्था देखिएपछि नेपाल प्रहरीले प्रदर्शनकारीलाई रोक्न प्रयास गरेको थियो।
यस क्रममा प्रदर्शनकारी र प्रहरीबीच केही समय धकेलाधकेल भएको थियो। यद्यपि स्थिति थप उग्र बन्न नदिई प्रहरीले प्रदर्शनलाई नियन्त्रणमा लिएको थियो। घटनास्थलमा सुरक्षाकर्मीको उपस्थिति बढाइएको थियो।
प्रदर्शनकारीहरूले गणेश नेपालीको मृत्युबारे निष्पक्ष छानबिन, जिम्मेवार पक्षमाथि कानुनी कारबाही तथा पीडित परिवारलाई न्याय दिलाउन सरकारसँग माग गरेका छन्। घटनालाई लिएर सार्वजनिक चासो बढिरहेका बेला सम्बन्धित निकायले आवश्यक अनुसन्धान अघि बढाइरहेको जनाएको छ।
