काठमाडौं । काठमाडौं महानगरपालिका–१० बुद्धनगरमा डेरा गरेर बस्ने एक व्यक्तिले शनिबार बिहान आत्मदाहको प्रयास गरेका छन्। घरायसी विवादका कारण उनले आफ्नै कोठामा शरीरमा आगो लगाएको प्रारम्भिक अनुसन्धानबाट खुलेको प्रहरीले जनाएको छ।
काठमाडौं प्रहरी परिसरका एसपी पवन भट्टराईका अनुसार बिहान करिब ६:२० बजे ४५ वर्षीय अस्विन राउतले आफ्नै कोठामा आत्मदाहको प्रयास गरेका हुन्। घटनाको जानकारी प्राप्त हुनासाथ प्रहरी टोली तत्काल घटनास्थल पुगेको थियो।
प्रहरीले स्थानीयको सहयोगमा उनलाई उद्धार गरी तत्काल उपचारका लागि वीर अस्पताल पठाएको जनाएको छ। हाल उनको स्वास्थ्य अवस्था र जलेको शरीरको क्षतिको विस्तृत विवरण सार्वजनिक गरिएको छैन। चिकित्सकको निगरानीमा उनको उपचार भइरहेको प्रहरीले जनाएको छ।
प्रारम्भिक अनुसन्धानअनुसार घरायसी विवादका कारण उनले यस्तो कदम चालेको हुन सक्ने देखिएको छ। घटनाको वास्तविक कारण र अन्य पक्षबारे प्रहरीले थप अनुसन्धान अघि बढाएको जनाएको छ।
पछिल्लो समय आत्मदाहका प्रयासका घटना बढ्दै गएको देखिएको छ। केही दिनअघि काठमाडौंको त्रिपुरेश्वरमा गणेश नेपालीले आत्मदाहको प्रयास गरेका थिए। उपचारका क्रममा उनको मृत्यु भएको थियो। त्यसैगरी सर्लाहीका अर्का एक व्यक्तिले पनि आत्मदाहको प्रयास गरेका छन् र उनी हाल कीर्तिपुरस्थित अस्पतालमा उपचाररत छन्।
यदि तपाईं वा तपाईंले चिन्ने कुनै व्यक्ति अत्यधिक तनाव, निराशा वा आत्महत्यासम्बन्धी सोचसँग संघर्ष गरिरहनुभएको छ भने, कृपया विश्वासिलो परिवारका सदस्य, साथी, मानसिक स्वास्थ्य विशेषज्ञ वा नजिकको स्वास्थ्य संस्थासँग तत्काल सहयोग लिनुहोस्। समयमै सहयोग खोज्नु जीवनरक्षक हुन सक्छ।
