काठमाडौं । परराष्ट्रमन्त्री शिशिर खनालले नेपाल–भारत सम्बन्धलाई भू–राजनीतिक तनावको दृष्टिकोणबाट हटाएर विकास, प्रविधि र आर्थिक रूपान्तरणमा केन्द्रित नयाँ साझेदारीका रूपमा अघि बढाउन चाहेको बताएका छन् ।
भारतको नयाँदिल्लीस्थित नेपाली दूतावासमा आइतबार आयोजित पत्रकार सम्मेलनमा बोल्दै उनले नेपाल–भारत सम्बन्धलाई पुरानो राजनीतिक दृष्टिकोणभन्दा माथि उठाएर परिणाममुखी कूटनीतितर्फ लैजानुपर्ने आवश्यकता रहेको बताए ।
मन्त्री खनालले राष्ट्रिय स्वतन्त्र पार्टी नेतृत्वको सरकार विगतका राजनीतिक बोझबाट मुक्त भएर काम गर्न चाहेको उल्लेख गर्दै सुशासन र जवाफदेहितामा आधारित नयाँ राजनीतिक दृष्टिकोणका साथ अघि बढिरहेको बताए ।
उनका अनुसार भारत भ्रमणका क्रममा व्यापार, ऊर्जा, पूर्वाधार, जलस्रोत र जनस्तरका सम्बन्ध सुदृढ बनाउने विषयमा विस्तृत छलफल भएको छ ।
भारतका विदेशमन्त्री डा. एस. जयशंकरसँगको द्विपक्षीय वार्तामा सीमापार सम्पर्क विस्तार, ऊर्जा साझेदारी र आर्थिक सहकार्यका विषयमा छलफल भएको उनले जानकारी दिए ।
मन्त्री खनालका अनुसार नेपाल–भारतबीच सीमापार डिजिटल भुक्तानी प्रणाली सञ्चालनमा आएको छ, जसले दुवै देशका नागरिक, पर्यटक र साना व्यवसायीलाई प्रत्यक्ष लाभ पुग्नेछ ।
उनले भारतीय सहयोगमा निर्माण भएका ७२ वटा स्वास्थ्य तथा १२ वटा सांस्कृतिक भूकम्पपछिका पुनर्निर्माण परियोजना औपचारिक रूपमा हस्तान्तरण भएको जानकारी पनि दिए।
त्यसैगरी काठमाडौं विश्वविद्यालय र भारतको भाषिणी डिभिजनबीच भाषा अनुवादसम्बन्धी डिजिटल पूर्वाधार विकासका लागि समझदारी भएको उनले बताए ।
सीमा क्षेत्रमा लागू गरिएको भन्सार व्यवस्थाबारे उठेको प्रश्नको जवाफ दिँदै मन्त्री खनालले खुला सीमाको दुरुपयोग रोक्नका लागि उक्त व्यवस्था ल्याइएको स्पष्ट पारे ।
उनले भारतीय नागरिकलाई नेपाल भ्रमणका लागि आमन्त्रण गर्दै पशुपतिनाथ, जनकपुर, लुम्बिनी र मुक्तिनाथजस्ता धार्मिक तथा सांस्कृतिक स्थलको अनुभव लिन आग्रह गरे ।
भारतका विदेशमन्त्री डा. एस. जयशंकरको निमन्त्रणामा मन्त्री खनाल भारत भ्रमणमा गएका हुन् ।
