काठमाडाैं । विपक्षी राजनीतिक दलका सांसदहरूको नाराबाजी र चर्को विरोधकाबीच पनि प्रतिनिधिसभाको आइतबार बसेको बैठकले नयाँ नियमावली पारित गरेको छ ।

प्रतिनिधिसभाको नयाँ नियमावलीले सांसदहरूका लागि विशेष कानूनी संरक्षण र विशेषाधिकार प्रदान गरेको हाे । नियमावलीको नियम २५९ अनुसार प्रचलित अन्य कानूनमा जुनसुकै कुरा लेखिएको भए तापनि सभा, समिति र सांसदहरूको हकमा यो नियमावली विशेष कानुनसरह लागू हुने लेखिएको छ । त्यस्तै, नियम २६१ मा यस नियमावलीबमोजिम सम्पादन गरिने सम्पूर्ण कामकारबाहीलाई संसद्को आन्तरिक मामिला मानिने र यस सम्बन्धमा कुनै पनि अदालतमा प्रश्न उठाउन नपाइने उल्लेख गरिएकाे छ ।

यस नियमावलीको अन्तिम व्याख्या गर्ने पूर्ण अधिकार सभामुखलाई सुम्पिएको हाे । यो नयाँ व्यवस्था सांसदहरूको निलम्बन र पक्राउ प्रक्रियासँग समेत जोडिएको छ । नियमावलीको नियम २४७ मा सांसद पक्राउको जानकारी दिने व्यवस्था रहेकाे छ । जसअनुसार संविधानको धारा १०३ लाई आधार मान्दै संसद् अधिवेशन चालू रहेको अवधिभर कुनै पनि सांसदलाई पक्राउ गर्न नपाइने विशेषाधिकार सुनिश्चित गरिएको छ ।