एजेन्सी । अमेरिकी राष्ट्रपति डोनाल्ड ट्रम्पले इरानसँग जारी युद्ध अन्त्यका लागि महत्त्वपूर्ण शान्ति सम्झौता करिब अन्तिम चरणमा पुगेको दावी गर्नुभएकाे छ ।
राष्ट्रपति ट्रम्पले सामाजिक सञ्जाल ट्रुथ सोसलमार्फत सम्झौताका अन्तिम विवरणहरू छिट्टै सार्वजनिक गरिने समेत जानकारी गराउनुभएको हाे । प्रस्तावित सम्झौतामा विश्व व्यापारका लागि अत्यन्त संवेदनशील मानिने हर्मुज जलमार्ग पुनः सञ्चालन गर्ने विषय मुख्य रूपमा समावेश छ । राष्ट्रपति ट्रम्पले यसकाे बारेमा थप विवरण भने खुलाउनुभएको छैन । इरानका विदेश मन्त्रालयका प्रवक्ता इस्माइल बाघायी हमानेहले पनि अमेरिकी र इरानबीचको शान्ति वार्ता अत्यन्तै सकारात्मक रूपमा अघि बढेको बताउनुभयाे ।
तर मुख्य विषयहरूमा अझै पूर्ण सहमति नभएको र अमेरिकाले विरोधाभासी अभिव्यक्ति दिइरहेको इरानले आरोप लगाइरहेको छ । बीबीसीले राष्ट्रपति ट्रम्पले साउदी अरेबिया, युएई र कतारसहित अन्य खाडी देशका नेताहरूसँग वार्ता सकारात्मक भएको बताउनुभएको छ । उहाँले इजरायली प्रधानमन्त्री बेन्जामिन नेतान्याहूसँगको संवाद पनि सकारात्मक रूपमा चलिरहेको बताउनुभयाे ।
गत फेब्रुअरी २८ तारिखमा अमेरिका र इजरायलले इरानमाथि संयुक्त रूपमा ठूलो आक्रमण गरेका थिए । अप्रिलको शुरुवातमा युद्ध विराम भएपछि अमेरिका र इरानबीच दीर्घकालीन शान्ति सम्झौताका लागि वार्ताको प्रयास भइरहेको छ । यसको मध्यस्थता पाकिस्तानले गरिरहेको छ । पाकिस्तानका सेना प्रमुख आसिम मुनीर इरानको राजधानी तेहरान पुग्नुभएको छ ।
दुई देशबीचको युद्धले अहिलेसम्म ठूलो क्षति भइसकेको छ । विश्वभर तेल आपूर्तिमा अवरोधसँगै मूल्य तीव्र रूपमा बढेको हाे । इरानको तेल निर्यात लगभग ठप्प हुँदा उसको अर्थतन्त्रमा ठूलो दबाब परेको छ । अमेरिका र युरोपमा पनि मुद्रास्फीति तथा इन्धन खर्च बढेको हाे ।
युद्ध अन्त्य नभए विश्वव्यापी आर्थिक मन्दीको जोखिम बढ्ने विश्लेषण भइरहेको बीबीसीले जनाएकाे छ ।
