काठमाडौं । नयाँ वर्ष २०८३ को अवसर पारेर काठमाडौं उपत्यकामा रात्रिकालीन बस सेवा सुरु गरिएको छ। सुनिता डंगोल ले सेवाको शुभारम्भ गर्दै यसलाई विस्तार गर्दै लैजाने प्रतिबद्धता व्यक्त गरेकी छन्।
हाल पहिलो चरणमा दुई रुटबाट सेवा सुरु गरिएको छ। लगनखेलदेखि बुढानीलकण्ठ र नागढुंगा (थानकोट) देखि त्रिभुवन अन्तर्राष्ट्रिय विमानस्थलसम्म विद्युतीय बस सञ्चालनमा आएका छन्। राति ८ बजेदेखि ११ बजेसम्म प्रत्येक २० मिनेटमा बस चल्ने व्यवस्था गरिएको छ।
महानगरका अनुसार, रिङरोड तथा अन्य क्षेत्रमा पनि रात्री बस सेवाको माग बढिरहेको छ। त्यसैले आगामी दिनमा चक्रपथ र भक्तपुर क्षेत्रमा पनि सेवा विस्तार गरिने योजना छ।
रात्रिकालीन सेवासँगै बिहान सबेरै काममा जाने श्रमिक र विद्यार्थीलाई लक्षित गर्दै बिहान साढे ४ बजेदेखि बस सञ्चालन गर्ने तयारी भइरहेको जनाइएको छ। यसका लागि बुढानीलकण्ठ नगरपालिका र चन्द्रागिरी नगरपालिका ले चार्जिङ स्टेशनका लागि स्थान उपलब्ध गराउने प्रतिबद्धता जनाएका छन्।
यसअघि रात्रिकालीन बस सेवा सफल हुन नसकेको अनुभवलाई ध्यानमा राख्दै यसपटक नाफाभन्दा सेवा प्रभावकारी बनाउनेतर्फ जोड दिइएको छ। काठमाडौं महानगरपालिका ले उपत्यकाका अन्य स्थानीय तहसँग सहकार्य गरेर सेवा सञ्चालनलाई दिगो बनाउने तयारी गरेको छ।
रात्री यात्रालाई सुरक्षित बनाउन प्रत्येक बसमा नगर प्रहरी खटाइने व्यवस्था गरिएको छ। यसले यात्रुहरूलाई सुरक्षित र सहज यात्रा गर्न सहयोग पुग्ने विश्वास गरिएको छ।
सेवा सञ्चालनको खर्च सुरुमा साझा यातायात ले व्यहोर्नेछ। पछि टिकट आम्दानीले खर्च नधान्ने भएमा सम्बन्धित नगरपालिकाहरूले बजेट व्यवस्था गर्ने सहमति भएको छ। साथै, ‘रात्रिकालीन साझा बस सञ्चालन बास्केट फण्ड’ पनि स्थापना गरिने बताइएको छ।
यस सेवाबाट राति काम गर्ने व्यक्ति, अस्पताल जाने–आउने यात्रु, पर्यटक तथा आम नागरिकलाई सहज र सुरक्षित यातायात सुविधा उपलब्ध हुने अपेक्षा गरिएको छ।
