काठमाडौं । हाल नेपालमा पश्चिमी वायु तथा स्थानीय वायुको आंशिक प्रभाव कायम रहेको छ ।
मौसम पूर्वानुमान महाशाखाका अनुसार मंगलबार बिहान लुम्बिनी प्रदेश र सुदूरपश्चिम प्रदेश लगायत देशका पहाडी भू-भागमा आंशिकदेखि सामान्य बदली रहेको छ भने अन्य भू-भागमा मौसम मुख्यतया सफा रहेको छ । गण्डकी प्रदेश का केही पहाडी क्षेत्रमा हल्का वर्षा भइरहेको जनाइएको छ ।
महाशाखाका अनुसार दिउँसो कोशी प्रदेश र मधेश प्रदेश सहित देशका पहाडी तथा हिमाली भू-भागमा आंशिकदेखि सामान्य बदली रहनेछ । तराई भू-भागमा आंशिक बदली रहने जनाइएको छ । कोशी प्रदेश लगायत देशका पहाडी–हिमाली तथा अन्य केही स्थानमा मेघगर्जन, चट्याङ, हावाहुरी तथा असिनासहित मध्यम वर्षा र हिमपातको सम्भावना रहेको छ ।
त्यस्तै, राति कोशी प्रदेश लगायत देशका हिमाली भू-भागमा सामान्य बदली रहनेछ भने पहाडी क्षेत्रमा आंशिक बदली र तराईमा मौसम मुख्यतया सफा रहनेछ । बागमती प्रदेश, गण्डकी र कर्णाली प्रदेश का हिमाली भू-भागका केही स्थानमा मेघगर्जनसहित हल्का वर्षा तथा हिमपातको सम्भावना रहेको महाशाखाले जनाएको छ ।
