काठमाडौँ । गत भदौ २३ र २४ गते भएको जेनजी आन्दोलनका क्रममा घाइते भएकाहरूको विवरण सार्वजनिक गरिएको छ। स्वास्थ्य तथा जनसङ्ख्या मन्त्रालयले आन्दोलनका क्रममा विभिन्न अस्पतालमा उपचार गरिएका घाइतेहरूको नामसहितको विवरण सार्वजनिक गरेको हो।
मन्त्रालयका प्रवक्ता डा. प्रकाश बुढाथोकीका अनुसार आन्दोलनका क्रममा देशभरिका ९९ वटा अस्पतालमा उपचार गरिएका घाइतेहरूको विवरण सङ्कलन गरेर सार्वजनिक गरिएको हो। उनका अनुसार आन्दोलनका क्रममा कुल दुई हजार ६३८ जना घाइतेको उपचार भएको तथ्याङ्क प्राप्त भएको छ।
प्रवक्ता बुढाथोकीले आन्दोलनका क्रममा उपचार भएका सबै अस्पतालबाट घाइतेहरूको विवरण सङ्कलन गर्ने कार्य गरिएको भए पनि केही अस्पतालबाट विवरण आउन ढिलाइ भएका कारण सम्पूर्ण तथ्याङ्क सार्वजनिक गर्न समय लागेको बताए। उनले हाल सबै घाइतेको विवरण गृह मन्त्रालयलाई पठाइसकिएको जानकारी दिए।
मन्त्रालयले उपलब्ध गराएको विवरणअनुसार गत असोज ३१ गते दुई हजार ५२२ जना घाइतेको विवरण पठाइएको थियो। त्यसपछि गत माघ ४ गते थप ७७ जनाको विवरण गृह मन्त्रालयमा पठाइएको थियो भने यही फागुन २९ गते थप ३९ जनाको विवरण पठाइएको जनाइएको छ।
उपचार गरिएका घाइतेमध्ये सबैभन्दा धेरै नयाँ बानेश्वरस्थित निजामती कर्मचारी अस्पतालमा उपचार गरिएको मन्त्रालयले जनाएको छ। उक्त अस्पतालमा मात्रै ४५८ जना घाइतेको उपचार गरिएको छ।
त्यसैगरी नेपाल पुलिस अस्पतालमा २०३ जना, राष्ट्रिय ट्रमा सेन्टरमा १९० जना र त्रिभुवन विश्वविद्यालय शिक्षण अस्पतालमा १०८ जना घाइतेको उपचार गरिएको विवरणमा उल्लेख गरिएको छ।
स्वास्थ्य तथा जनसङ्ख्या मन्त्रालयले आन्दोलनका क्रममा घाइते भएका सबै व्यक्तिहरूको उपचारसम्बन्धी विवरण गृह मन्त्रालयलाई उपलब्ध गराइसकेको जनाएको छ। सरकारले उक्त विवरणका आधारमा थप आवश्यक प्रक्रिया अघि बढाउने अपेक्षा गरिएको छ।
