काठमाडौँ – एनसेलले पोखरामा आफ्नो सेन्टर पुनः सञ्चालनमा ल्याएको छ। पोखरामा रहेको सेन्टर जेनजी आन्दोलनका बेला तोडफोड भएपछि बन्द भएको थियो। मर्मत सम्भारपछि कम्पनीले बिहीबार विशेष कार्यक्रममा सेन्टरको उद्घाटन गरेको हो।
उद्घाटन कार्यक्रममा एनसेलकी ग्राहक सेवा प्रबन्धक ज्योति दाहाल र पोखरा नुडल्सका एचआर अफिसर यमप्रसाद गौतम उपस्थित थिए। सेन्टरमा क्षति पुगेर बन्द भएपछि कम्पनीले अस्थायी रुपमा ग्राहक सेवाहरू एक तल्लामाथि रहेको कार्यालयबाट प्रदान गर्दै आएको थियो।
उद्घाटन अवसरमा दाहालले बताइन् कि सेन्टर पुनः सञ्चालनमा ल्याइएको उद्देश्य ग्राहकलाई एकै स्थानबाट विभिन्न सेवा उपलब्ध गराउने र विश्वस्तरीय सेवा अनुभव प्रदान गर्नु हो। ग्राहकहरूले यस सेन्टरबाट सिम खरिद, इन्टरनेट सेटिङ, फोरजी अपग्रेड, मोबाइल नम्बर परिवर्तन, सिम ईसीएममा अपग्रेड, सीयुजी नम्बरहरूको आवश्यक फेरबदल, अन्तर्राष्ट्रिय रोमिङ, बिल तिर्न, ब्यालेन्स रिचार्ज, ट्रान्सफर लगायतका सेवाहरू प्राप्त गर्न सक्नेछन्।
एनसेलले देशभरि ३१ वटा सेन्टर सञ्चालन गर्दै आएको छ र ग्राहकहरूको सहजता तथा सेवा गुणस्तर सुनिश्चित गर्न नियमित रूपमा सुधार गर्दै आएको कम्पनीले जनाएको छ।
पोखरामा पुनः सञ्चालनमा आएको सेन्टरले स्थानीय ग्राहकहरूलाई दक्ष र सुविधा सम्पन्न सेवा उपलब्ध गराउने विश्वास गरिएको छ।
