काठमाडौं । **जल तथा मौसम पूर्वानुमान महाशाखा**ले आज देशका विभिन्न भूभागमा मौसम आंशिक बदलीदेखि सामान्य सफा रहने जनाएको छ । विशेषगरी तराई भूभागका केही स्थानमा आज मध्याह्नसम्म कुहिरो लाग्ने सम्भावना रहेको महाशाखाले जनाएको छ ।
महाशाखाका अनुसार देशका उच्च पहाडी तथा हिमाली भूभागमा आंशिक बदली रहनेछ भने अन्य अधिकांश भूभागमा मौसम मुख्यतया सफा रहने अनुमान गरिएको छ । कोशी, गण्डकी र कर्णाली प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा तथा हिमपातको सम्भावना रहेको बताइएको छ ।
आज रातिको मौसम अवस्थाबारे पनि महाशाखाले जानकारी दिँदै तराईका केही स्थानमा तुवाँलो लाग्ने सम्भावना रहेको जनाएको छ । त्यसैगरी कर्णाली, सुदूरपश्चिम तथा गण्डकी प्रदेशका पहाडी र हिमाली भूभागमा आंशिक बदली रहनेछ भने अन्य भागमा मौसम सामान्यतया सफा रहने अनुमान गरिएको छ । गण्डकी प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा र हिमपातको सम्भावना पनि रहेको बताइएको छ ।
हाल नेपालमा पश्चिमी वायुको सामान्य प्रभाव कायम रहेको छ । यसको असरका कारण कोशी, गण्डकी र कर्णाली प्रदेशका उच्च पहाडी तथा हिमाली भूभागमा आंशिक बादल लागेको छ भने बाँकी अधिकांश भूभागमा मौसम सफा रहेको मौसमविद्ले बताएका छन् ।
मौसमविद्ले विशेषगरी कुहिरो र तुवाँलोका कारण तराई क्षेत्रमा दृश्यता कम हुनसक्ने भएकाले यातायात र दैनिक गतिविधिमा सावधानी अपनाउन सर्वसाधारणलाई आग्रह गरेका छन् ।
